وقد عرضت في القاهرة عام 2005 من اخراج شهيد الثقافة المرحوم الدكتور صالح سعد
ومن بطولة نيفين ابراهيم في دور نورا 1
ومحمد شندي في دور هلمر2
و د.صالح سعد في دور هلمر 1
و ماجدة منير في دور نورا 2
قام بعمل السينوجرافياالفنان السوداني د.عادل كبيدة
و قام بالادارة المسرحية الفنان الصغير مصطفى
وقد عرضت الفرقة في سلو فينيا المسرحية في افتتاح اسبوع المسرح السلوفيني عام 2005
ونالت اعجابا منقطع النظير
في سلوفينيا لعب الفنان الشاب احمد صلاح دور هلمر1
الفصل الاول
شقه متوسطه المستوى بها كنبه صوفا وكرسى فوتيه وطاوله للقهوه وفى أحد الأركان يوجد طاوله أخرى لجهاز كمبيوتر ومونيتور والشقه بها نباتات ظل ولوحات فنيه من المعتاد ان نراها فى منازل الطبقه المتوسطه المثقفه. وهناك أيضاً أرفف عليها العديد من الكتب .. .. الشقه ذوقها مرتفع ينم عن إرتفاع المستوى الثقافى وليس مستوى الثراء فى المدخل على اليمين وفى العمق يوجد باب للمطبخ وعلى اليسار يوجد باب حجره النوم.
تجلس نورا 1 على الصوفا مرتديه روب حمام أزرق ,وهى مثال للصحه والجمال.
وترشف شاى صحى بالفتله ويجلس هلمر 1 على الفوتاى وبجانبه على الأرض حقيبه كبيره من تلك الحقائب التى يستخدمها الباعه الجائلون
أما هلمر 2 فيجلس أمام شاشة الكمبيوتر وهو يجوب الإنترنت ويجلس مرتدياً روب حمام
نورا 1 تتصفح كتاباً ضخماً وهى ترشف الشاى, ثم تضع الكتاب على الطاوله
ملوش فايده ... نورا1:مش محتاجه ... أنا آسفه
هلمر1: مفيد جداً فى حل الكلمات المتقاطعه
نورا1:عارف ... أنا محلوله جداً ومتقطعه خلقه ... مبحبهاش .. بعت كتير ؟
هلمر1: مش النهارده
نورا1:يا عينى ... يا صغنن
هلمر1:يمكن فيها رزاله لكن لازم كل عيله يكون عندها واحد
نورا1:بس أنا مش عيله .. وإنت ؟
ولا أنا هلمر1:
نورا1:كمان مفيش كلام جديد ... على الأقل بالنسبه لى كله قديم ... ومعفن
(نورا تمد يدها وترشف رشفه من كوب الشاى)
هلمر1:الكتاب دا فيه اكثر من 2000 كلمه ومش حتلاقيهم فى أى قاموس تانى
نورا1:مثلا؟ً
مثلاً (يأخذ القاموس ويقلب صفحاته بسرعه)
عمركيش سمعتى عن كلمه كاروشى
نورا1:إيه ده ... المفروض أعرفها ؟
هلمر1:دى كلمه يابانيه معناها الموت من الأفراط فى العمل أو الأرهاق الناجم عن العمل
نورا1:الحقيقه أنا ممكن أموت من قلته مش من الإفراط
هلمر1:أو مثلاً كلمة كارا أوكى
يا راجل ومين ميعرفش كلمه الكارا أو كى : نورا1
هلمر1:أيوه كل الناس عارفاها .. بس مين يعرف معناها الحقيقى ؟ الفرقه الموسيقيه الفارغه
نورا1:حاجه جميله قوى .. مثلاً الواحد يقدر يقول فيه فرقه موسيقيه فاضيه قاعده تلعب فى حياتى طول السنين اللى فاتت .. وم حدش بيغنى لى
هلمر1:إنتى ما بتغنيش ؟
معنديش ودن موسيقيه نورا1:
لازم تلاقى حد يغنيلك هلمر1:
نورا1:عندك حد معين ؟
هلمر1:أو مثلاً مثلاً يعنى «كلمه كايزن» دى معناها التغيير للأحسن باستمرار ... كمان ممكن تعنى زيادة الانتاجيه .. دى ممكن تبقى فلسفه حياه ..
نورا 1:وهى كده بالنسبه لك ؟
هلمر1:أحيانا بأتعب ... وإنتى ؟
نورا1:زهقت من التعب .. أنا دلوقتى مرتاحه ومبلطه فى الخط .. مستنيه فى أوضه الإنتظار لحد ما ينادولى
هلمر1:إيه اللى مكتوب على الباب باللاتينى ده .... كل من يدخل عليه أن يأمل ؟
نورا1:إيه بتمتحنى ؟
أبداً .. أبداً .. وأنا أقدر .. واضح إنك مثقفه قوى هلمر1:
نورا1:واضح .. من إيه ؟
هلمر1:الراجل برضه بيميز صنف الحريم اللى بيتعامل معاه
نورا1:إيه دا حدس رجالى ؟ حاسه سادسه
سميها زى ما تحبى هلمر1:
نورا1:ودى من قاموس الكلمات الجديدة ؟
بالضبط ... قلب الهدف هلمر1:
نورا1:ودى برضوا من قاموس الكلمات الجديدة ؟
هلمر1:لا قلب الهدف كلمه قديمه .. دى معناها الرامى أو النبال أصاب الهدف بالظبط
نورا1:هو احنا فى معركه ؟
هلمر1:ومعناها إن الملاحظه فى محلها بالظبط
نورا1:شكراً للمعلومه ... هو إنت مدرس ؟
يضحك) أبداً .. أبداً ... وإنت ؟ )هلمر1:
نورا1:أنا سألت الأول ومتقوليش إنك بياع من اللى بيخبطوا على البيوت ويقولوا عايزين كتب عايزين كياس زباله
هلمر1:وليه لأ ؟
نورا1:ما تشبهش
هلمر1:اشمعنى؟
نورا1:الحدس النسائى ... الحاسه السادسه لو حبيت
هلمر1:عندك حق .. دى وظيفه مؤقته .. بارت تايم يعنى .. فى الحقيقه أنا .... مغرقاتى
نورا1:(تتمعن فيه) مغنواتى
هلمر1:مغرقاتى ... بالقاف .. زى القاهره .. القلعة
نورا1:ودى رخره كلمه جديده ؟
أيوه ومش حتلاقيها حتى فى القاموس ده هلمر1:
نورا1:وبتغرق إيه بقى؟
هلمر1 :غيطان وصحارى ... طول م مفيش مطرا أغرقهم وأحييهم
نورا1:عمل عظيم
هلمر1:وشاعرى .. بأعمل برك مليانه بالسحاب زى المرايا
.. النجوم تبص تشوف نفسها .. بتضوى فيها ..والقمر فى نص الليل يفرح بنفسه . والعالم بيعانى من الكوابيس
نورا1:ودى شغلانه بتكسب ؟
الحقيقه مش قوى لكن بأحبها .. بأكسب من بيع القواميس هلمر1:
لو فضلت على كده .. يمكن أفكر إشترى منك واحد نورا1:
هلمر1:تبقى خدمتينى وخدمتى نفسك كمان خدمه كبيره قوى
نورا1:وبتغرق إيه كمان ؟ الأرواح التعبانه
هلمر1:حصل
نورا1:أظن فيها طابور إنتظار
هلمر1:مش قوى كده .. وحتى لو كان فيه ... الناس بتتصرف وتاخد دور مش دورها من مجرد نظره، حركه ، همسه
نورا1:علشان محظوظين ؟
علشان موهوبين هلمر1:
:تحب تشرب شاى فتله. ده صحى جداً (هلمر يضحك) إنت بتضحك ولا مكسوف نورا1
هلمر1:بضحك علشان إنت نجحتى وإتصرفتى وعديتى الطابور كله
نورا1:بالشاى الفتله ؟
هلمر1:مش بالضبط ... بالطريقه اللى عرضتى بيها
نورا1:ودلوقتى هتغرقني
هلمر1:مش بإيدى ... المغرقاتى بيسمع الصوت اللى جاى من جوه
نورا1:وده مش موجود
هلمر1:المغرقاتى مجرد وسيله ... بينفذ أوامر الطبيعه ونداءها لحفظ التوازن والنوع
نورا1:حاجه جميله قوى
هلمر1:مسئوليه كبيره
نورا1:فيه كتير منكوا ؟
هلمر1:لازم فيه ... بس ملناش إتصال ببعض
نورا1:مش كويس
هلمر1:بالعكس .. ده طبيعى جداً .. لو عملنا نقابه حنبدأ نطالب بحقنا ودا ممكن يعمل مصايب
نورا1:لما الواحد يطلب حقه يعمل مصيبه ؟
هلمر1:طبعاً ... المهنه تبقى مؤامره ضد الناس اللى مفروض تخدمهم
نورا1:مش بالتغريق طبعاً
هلمر1:طبعآً .. فيه مزايا إن الواحد يبقى مغرقاتى أهم حاجه إننا م بنخدش فلوس على شغلنا
نورا1:ودى ميزه إيه دي ؟
هلمر1:طبعاً ميزه .. لو أخدنا هنحب الفلوس ونغرق اكتر واكتر .. ودا ممكن يعمل فيضان ولا حتى طوفان زى بتاع نوح
نورا1:عمرى م فكرت فى الموضوع ده
هلمر1:كمان ممكن تجينى طالبيه أغرق بلاد معينه تستحق طبعاً .. أو حتى جيوش بتهاجم
بلاد معينه .. أو بيوت الناس المهمه اللى بتعمل بلاوى
نورا1:قاعد قدامى منقذ العالم ؟
هلمر1:وإنت ؟
نورا1:أنا ؟
هلمر1:إيه إهتماماتك ؟
نورا1:إهتماماتى ؟ الحاجات اللى محبهاش فى شخصيتى
هلمر1:قصدى بتشتغلى إيه ... ومش بالضبط كده إيه هدفك فى الحياه .. كل واحد هنا
له سبب له هدف
نورا1:(تمد يدها اليمنى ) بتحب ضوافرى
ولا
مش عجبينك ؟
هلمر1:بموت فى صوابعك
نورا1:(تنظر لأظافرها) حقيقى .. مره واحد قال إنهم بيفكروه بمخالب وحش مفترس ... نفسه يغرسهم فى أول فريسه تقع فى طريقه
هلمر1:يمكن كان نفسه تغرسيهم فيه
نورا1:غرستهم ... وكانت كارثه لينا إحنا الإتنين علشان كده أفضل مغرسهومش فى حد خالص كفايه أحطلهم مانيكير ... وهو ده هدفى فى الحياه
هلمر1:بتعملى مانيكير لضوافرك ؟
نورا1:مش ضوافرى أنا بس ... فيه ستات كتير عاوزين تبقى مخالبهم حلوه
يبقى إنتى هلمر1:
مانيكرست
نورا1:كلمه قديمه مش كده ... ورينى صوابعك ... (هلمرا يمد يده .. تنحنى نورا على الطاوله وتنظر إليهم ) مش وحشين ... واخد بالك منهم ... أنا بحب الراجل كده ... لو حبيت أعملك علاج كامل تعالى فى دكانى فى المول ...
هلمر1:وإيه بقى العلاج الكامل ؟
نورا1:حسب الزبون .. عادة .. الزيارات ببلاش
هلمر1:(يسعل سعله خفيفه ) عشان كل واحد .... واللا علشان أصحاب الحظ السعيد
نورا1:واحد فى السنه .. لو كنت عايز تعرف
هلمر1:التواضع فضيله كبيره
لكن أظن الموضوع مينفعش مع الرجاله ... هتيجى ؟ نورا1:
هلمر1: ممكن جداً
نورا1:أنا كمان شغلتى عظيمه ومسؤليه كبيره .... لو العالم حيفضل فى إدين الرجاله ... الأحسن تبقى إيدين متمنكره
هلمر1: متأكده إن العالم فى إيدين رجاله ؟
فى إيديك على الأقل .. دا إنت تقدر تغرقه نورا1:
هلمر1: حتشترى القاموس ؟
نورا1:أظن لازم أقول أيوه مش كده ؟ خصوصاً وفيه كلمات كتير بتبدأ بحرف الكاف فيه كلمات تانيه ؟
هلمر1:(يبحث) ك ... ك ... أيوه فيه ..... كينزيولوجى
نورا1: ودى ليها علاقه بكينيا ولا بالكنافا
لا دى ولا دى .. دى من كينتيكس علم دراسه حركه الأجسام هلمر1:
نورا1: حركه الأجسام ؟
هلمر1:دى طريقه جديده للعلاج باستخدام اللمس والمساج علشان تصحح الخلل فى طاقه الجسم
دى تنفعنى جداً .. ممكن تفرجنى ... ورينى كده نورا1:
الحقيقه لسه مكملتش الكورس (صمت) لكن أحاول هلمر1:
نوراا1: أنا إنسانه عمليه أشترى الكتاب لو كان مفيد
هلمر1: يعنى مش شايف كتب عمليه كتير
نورا1:كلها ... الشعر والروايه مفيده للروح .... يعنى تغريقه صغيره ع الديق كده ... لكن الست ديماً بتستنى المغرقاتى الحقيقى يدقلها ع الباب
هلمر1: أظن كده
والأحسن كمان لو كان شاطر فى فن الكينزيولوجى نورا1:
ما قلتلك أجرب هلمر1:
نورا1: مش من عندك مش كده ... قرب شويه ولا دا مساج عن بعد ؟
هلمر1:(يتحرك خلف الصوفا) مش عارف يمكن مش مفروض أعمل كده
1 :فيه لحظات بيبقى المفروض عكس الحياه نورا
تفتكرى إحنا عايشين لحظه من اللحظات ديه هلمر1:
الله أعلم (يقف هلمر خلف الصوفا) من ورا ؟ نورا1:
هلمر1: م بتحبيش من ورا ؟
نورا1:أبداً بحبه قوى من ورا .. بس الأول أفضل من قدام مواجهة إلتحام العين فى العين
((يضع يده على كتفها) ساعات الواحد لازم يعمل الحاجات خلف خلاف (يبدأ فى المساج)
نورا1: ليه ؟ علشان من ورا الراجل بيفتكر إنه ماسك الموضوع فى إيديه ؟
الراجل مش عايز يمسك حاجه فى إيده هلمر1:
الست بتفرض عليه يمسك ...
أنا حذرتك أنا مش محترف
نورا1: لكن موهوب ... أه ... الله .... يا جماله .... هنا أرجوك ... (تجذب يده نحو صدرها تحت روب الحمام) هنا ... أيوه هنا الطاقة نقصانى قوى (هلمر يمسك صدرها أو بالأحرى هى التى تفعل باستخدام يده)
هلمر1:أيوه يمكن أنا موهوب فعلاً
نورا1:طبعاً ... موهوب .. كل اللى إنت محتاجه حد يشجعك ... إيه الألذ ... اللى بنعمله وإلا التغريق ؟
هلمر1:
الإثنين واحد تقريبا
نورا1:دا نوع من التغريق مش كده ؟
هلمر1:
قريب جدا
نورا1:فى الحالة دى علشان م نغرقش الانتريه يالا بينا على مكان أنسب ... فى أوضه النوم بتاعتى
هلمر1:(يرفع يديه) أوكيه (تسحبه نورا من يده وتتجه به نحو الباب إلى اليسار) لحظه واحده (يتوقفان) لحد دلوقتى معرفتش إسمك
نورا1: ...
مهم؟
هلمر1:
المغرقاتيه رومانسيين قوى
نورا1:إسمى نورا
(هلمر1يضحك) إيه اللى بيضحكك ؟
هلمر1:
قلتى إسمك نورا
نورا1:
وفيها إيه ؟
هلمر1:النكته .... إن إسمى تورفالد
نورا1:
نكته .. فعلاً .... بس مش حلوه قوى
16 comments:
بعد تجربة التدوينات السابقة
اضع تجربة جديدة مسرحية على حلقات
المسرحية من ترجمتي
وقد عرضت على مسرح الهناجر في عيد الحب 2005
وعرضت في سلوفينيا في نفس العام
واعجب بها النقاد جدا
وللاسف لم يقدر لنا عرضها مرة اخرى
خالص المحبة لكل الاصدقاء الذين سيقرأون المسرحية
على حلقات
اسامة
السلام عليكم ورحمة الله وبركاته..
ازيك يا استاذ اسامة اخبارك اية يارب تكون بخير...تحياتى...يارب تكمل بس
انا هتابع معاك..ان شاء الله شكرا لك
الف شكر يا استاذ غزالي على التحية الرقيقة
انا الحمد لله
ان شاء الله حضرتك بخير وفي اتم صحة واحسن حال
حكمل يا جميل ان شاء الله
تحياتي
فى انتظار باقى الحلقات يا دكتورنا الكبير
ملحوظة على جنب : حلوين اوى الصورتين المحطوطين للمقارنة دول .. ياترى فليسار حضر العرض ده فى مصر ؟؟ وكان ايه رأيه فى الاخراج المصرى ؟
يا سلام عليك يا ي يا جميل خدت بالك طبعا من نقطة مرضيتش احطها
وهي ان الصورتين للمقارنة
فليسار حضر العرض في القاهرة و اعجب به
و العجيب ان الناس في سلوفينيا في ماريبور وهي البلد التي استضافت العرض
اعجبهم جدا
وعملنا لقاءات في التلفزيون و الجرائد
واهتموا جدا بموضوع الممنوعات و فكرة اختلاف الثقافات
الحقيقة كانت زيارة ناجحة
ان شاء الله اضع اليوم الحلقة التانية
و احب اسألك يا ي
سؤال
ايه رأيك في الترجمة؟؟
انا مترجم مسرحيتين تانيين لفليسار
ولو عجبتك الترجمة دي
ابقى ارفعهم برضه
ورانا ايه؟؟؟
دكتورنا الكبير
الترجمة لحد دلوقتى تمام التمام ومش حاسس بغربة وانا بأقرأ - وبالتأكيد لن اشعر بغربة وانا اسمع الحوار بالمسرحية بلسان مصرى ولهجة عامية- وهنا يحضرنى سؤال .. هل النص الاصلى برضه كان بالعامية السلوفانية؟ وهل برضه المسرحيات المترجمة بتحتاج لتمصير او- تأييف- زيها زى الروايات ام لا؟
وهل ياترى فليسار كان راضى لما اتنين عدلوا فى النص اللى كتبه؟ لان دلوقتى اكيد حضرتك ترجمت بتصرف حتى لاتفقد روح النص وايضا حتى لا يتوه القارىء العربى وفى نفس الوقت اكيد المخرج المسرحى كان ليه لمسات او وجهات نظر فى عرض الصورة .. يعنى المترجم والمخرج دلوقتى الاتنين متهمين بتحوير العمل الاصلى .. ماهو دفاعكم ؟؟
معلش يا دكتور نسيت اسأل فى ردى السابق على حاجة كمان .. هى مدونة د.وليد اتعمل عليها هاكينج ؟؟ لان مدونته واقعة وعليها فيروس كمان !!
اولا شكرا لان الترجمة عجباك يا ايماتيور
ثانيا يا جميل
طبعا كان لازم اعدل في النص وايفه كتير عشان يبقى ماشي مع جو مصر
ثالثا المخرج طلب تعديلات مني واحنا بنشتغل لان المرحوم د.صالح سعد برضه كان له وجهة نظر وتجربة مع الرقابة و خلافه
فليسار انبسط من العرض جدا
وفي سلوفينيا الناس انبسطت وقالت ان اداء المصريين كان اسخن و اكثر حرارة
لان مدرسة الاداء السلوفيني مدرسة الاداء البارد الالماني شوية
اتمنى ان المذكرة اللي قدمتها تعجب عدالة المحكمة
نقطة نظام يا ي... مفيش عامية سلوفينية
السلوفيني لغة حديثة نسبيا يعني من ييجي حوالي خمسميت ستميت سنة
وهناك عدة لهجات
انت نسيت المقالة بتاعة الترجمة ولا ايه؟
بخصوص مدونة وليد هو قفلها
عشان في شخص غريب فعلا متقصده وقرفه
وعامل مدونة بياخد شغل وليد ويشتمه ومسمي نفسه مريض نفسي
والاغرب انه بيدخل باسم وليد اي طبيب نفسي في المنتديات ويقول كلام على لسان وليد
وده حصل في منتدى لا اعرفه لكن اعتقد انك عضو فيه ومن بين الناس اللي شتموا وليد كانت جبهة التهيييس الشعبية وهي بتعلق عندك واعتقد انك تعرفها
النت ده حاجة غريبة يا ي...امر الله
الدكتور وليد قفل مدونته !!!
غريبة دى خالص !! انا فعلا وقعت على مدونة مريض نفسى لما شفته بيعلق فى مدونة جبهة التهييس الشعبية اللى بتحررها نوارة نجم ابنة احمد فؤاد نجم وهى علقت عندى مرتين فعلا وانا علقت عندها مرة بعد ماكتبت رد عندى من سطر واحد بعنوان " الحرية للعريف محمد خلف" ولا توجد اتصالات اخرى خارج هذه التعليقات .. واول مرة اعرف انه فى خلاف بينها وبين د.وليد !!
ولا خلاف ولا حاجة
الشخص اللي بيهاجم وليد دخل عندها وكتب باسم وليد اي طبيب نفسي
وشتم فهي ردت عليه وهي لا تعرف وليد
الموضوع جنان يا ي
ووليد ريح دماغه
بلا خوتة
الله يسلمك يا دكتور محمد يا جميل
منورنا والله
خبر جميل عودة الدكتور وليد
وربنا يبعد الشر دايما عننا
تسمح لي ايها الانسان الجميل اختلف مع حضرتك في موضوع السلوفين والمصريين
يعني
لا طبعا صورة المصريين برضه فيها دلالات كتير و مرتبطة بالمسرحية و بالنص العربي كمان وده جزء من تصرفي في موضوع الترجمة دي اساسا
انا زي ما قلت في المقدمة الموجودة على موقع نورا نورا
ومحطوط له رابط في النص
كنت بترجم وفي دماغي العرض
و لم يحدني رقيب ولا حاجة لكن كان في دماغي فكرة المراوغة والملاوعة
وده جزء من طبيعة الجنس عند المصريين المحدثين على فكرة
وده تلاقيه في نص الدرة المشوي مثلا
و د.خالد ابو فارس
كتب كلام مشابه في تدوينته عن كوبا وفكرة البنت اللاتينية التي تستخدم انوثتها و دلالها
طيب انا حقولك مرة كنت رايح ازور واحد صاحبي
في حي الحضرة في الاسكندرية ايام الكلية
والحضرة حي شعبي جامد او طحن بلغة الشباب
فلقيت بياع سريح بينادي على البدنجان العروس
ويقول
يا طويل وناعم و سرح
نادته واحدة من الشباك
قالت له
يا بتاع البدنجان...عندك بدنجان؟؟
واخد بالك من الملاغية بتاعة الراجل
و الدلع بتاع الولية
يعني ممكن واحد يقول ايه الهبل ده امال بتاع البدنجان حيكون عنده ايه؟؟لوز اخضر
لكن الموضوع لا علاقة له بالبدنجان بالضبط زي ما الحوار مالوش علاقة بالقواميس في المسرحية
هو قال لها طبعا يا ست عندي بدنجان حلو قوي
فردت كبير وحلو؟؟ اصل محبش الصغير
بياخد غلبة على ما يتعمل
ده فرق كبير و ثقافي يا محمد
و الجو اللي عملوه الممثلين فيه البعد ده على فكرة
يعني الموضوع مركب برضه يا ابو يوسف
يا ريت يا دكتور محمد تحط لنا هنا برضه تصورك لاستخدام هاتان تفاحتان حمراوان في تحليل النص ده
انا وصلني شيء ما لكن مش متأكد ان كان هو اللي تقصده
دمت لاحبابك يا باشا
فين يا دكتورنا بقية المسرحية؟ احنا كده داخلين على سنة وهأضطر اقرأ الجزء الاول تانى علشان مفقدش التتابع
حالا يا باشا
ياااااه احلي واجمل مسرحيه اشتغلت فيها واول بطوله ليا هنمر 1 او وحيد 1 .. واحشني يا دكتور اسامه ويا ريت لو في تسجيل فيديو للمسرحيه
ياااااه احلي واجمل مسرحيه اشتغلت فيها واول بطوله ليا هنمر 1 او وحيد 1 .. واحشني يا دكتور اسامه ويا ريت لو في تسجيل فيديو للمسرحيه
Post a Comment