Monday, February 12, 2007

خليك سعيد51 الى النهاية

م51

مادة فيلمية

لقطات نادرة منوعة لرقص شرقى وغربى

م52 نهار\ داخلي

حجرة النوم

اشا نائمة والدكتور واقف على الباب يكح واضعا على فمه منديل أبيض

الدكتور: انت مش ها تيجى معايا؟

اشا متعبة: انت رايح فين؟

الدكتور:المحكمة, هاعدى على عم فاروق الاول

اشا: تعبانة شوية

الدكتور:اقعد معاكي

اشا: لا انزل انت وسلملى على عم فاروق

دوامة

م53 نهار\ داخلي

كابوس

يد اشا تعبث فى المخدة فيبرز منها القطن تبدأ فى سحبه للخارج

القطن ناصع البياض,اشا نائمة فوق سحابة قطنية مرتفعة عن الارض عند باب الحجرة الدكتور فى طريقه للخارج, تلتفت له اشا.

اشا: استنى معايا كل شوية سينما استنى أنا لا عارفة أقعد معاك ولا بننزل نتفسح.

يلتفت الدكتور : هوه احنا كنا بنتفسح غير نروح عند أهلك أنا ماليش أهل ,

ينزل, تبكى صوت معدنى: حوشى دموعك يا آمال

اشا: أنا مش آمال أنا عيشه..يا دكتور

الدكتوريبدو كطفل صغير يظهر أمامها: روحى عند أهلك يا آمال.

اشا: أنا ما ليش أهل..(تكح)

الطفل: اللى مالوش أهل الحكومة أهله.(تزداد كحتها)

الطفل: جاتك داهيه أنتى عندك سل ح تعدينى

اشا محمومة تكح وتبكى: السيما هى السبب انت اللى قلت عايز السيما

تسقط اشا من على السحابة الى اللا ارض

قطع

م54 نهار\ داخلي

وحدة علاج المنازعات

اتحاد الفصل فى المنازعات الفنية والأدبية والسنيمائية

قاعة فسيحة تشبه المحكمة رجلان وسيدتين جالسين امام مائده رفيعة جدا مثل بنش السوبر ماركت ومغطاة بمفرش أبيض بالقاعة الدكتور والنقاد و المخرج ومدير التاكسىوسامى الشامى.وتوتى والسكرتيرة وعدد من المشاهدين

الزعيم:.. هذا قد رأت وحدة علاج المنازعات بين الدكتور(صفير استهجان من القاعة)

الزعيم: وكل من السادة مدير التاكسى يقف ويلوح بمنديل وردي وينحنى ويوزع القبلات

الجمهور يصفق بايقاع منتظم( ايه الاستوك ده اللى ماشى يتوك ده)

الزعيم: والاخ برعى عيسوى المخرج ( يقف برعى يصفق بحرارة لنفسه)

الزعيم: والمواطن الشريف سامى بك الشامى

يقف سامى: زعلتنى انا مش بيه الالقاب اتلغت

الجمهور: عاش سامى بيه نصير العمال. عاش الاتحاد الاشتراكى

الزعيم : رأت أن

قطع

م55

مادة فيلمية

المضطهدون

م56 نهار\ داخلي

وحدة علاج المنازعات

الزعيم:رأت اللجنة بعد التشاور والتباحث....ان المسامح كريم

الدكتور: نعم يعنى إيه..

واحدة من الجالسين: يعنى يا دكتور يا بخت من بات مغلوب ولا بات غالب..

احدي الجالسات: ماتبقاش قاسى يا دكتور

مدير التاكسى: هو قاسي وموش سعيد بس سريالى حقيقي

الزعيم: جري ايه ياله ماتتصالح مع البهوات دا بيقولك انك سرواله الحقيقي ( موجها كلامه للمدير)لولا انك شايف أن هوه سروالك أنا كنت قطعتهولك.. الواد النصاب ده اللى يقولك دكتور.. ولا له فى التب حتى..

المدير: أوه سريالى حقيقى..

الزعيم: مش شايف الباشا برضه بيأكد أن أنت سرواله..

المدير: انت انت

الزعيم: يا باشا ده عيد يا باشا.. عيد كومى.. كومى.. أنا سروالك الجديد ؟.. طب سيبنى على ابن القديمة ده وأنا أقطعهولك

يتراجع الدكتور: عايزين إيه ؟..

كلهم فى نفس واحد: الصلح خير

الدكتور: الصلح خير قوم نتصالح..

تنطلق اغنية ( ياسريالى بموسيقى فالس والكان كان)

يقف الزعيم: دقيقة واحدة.. ويقوموا فى الهوا.. كلهم يدفعون البنش..باقدامهم يرفعوها فى الهوا.. كله لابس بنطلونات كله بيرفع رجليه فى الهوا

ينفصل الزعيم مع مدير التاكسى ويرقصوا مع بعض رقصة تحطيب فى شكل بلدى.. ويقربوا من بعض على.. يا سروالى .. ياسريالى..

رقصة الكان كان مادة فيلمية

المجموعات كلها ح تدخل فى الرقصة ما عدا الدكتور

مجموعة ترقص حوله رقص أفريقى.. الجو العام زار.. لقطة من فوق تاخد الجو العام.. من فوق المروحه اللى بتلف

بالتوازى مع رقصات نادرة – مادة فيلمية

قطع

م57

مادة فيلمية

عقلة الاصبع

اكلوا الحشرات

م58 نهار\ داخلي

البيت امام الكومبيوتر

فىالكمبيوتر باقى مشهد اكلي الحشرات يخرج من الكومبيوتر الشجرة و تنتشر فى المكان وتنتهى الى ضابط فضائى: مساء الخير يا أفندم أحنا اتحاد ولا يفل الحديد إلا الحديد..

الدكتور منزعجا: بسم الله الرحمن الرحيم انتو مين؟

ينقسم الضابط الي اثنين لهجته تتغير قليلا : أحنا جاين نتعرف يا كابتن

ينقسم الي أربعة ضابطين وجنديين..

الظابط لهجته تتغيراكثر: قوللى ياله أنت امبارح مش كنت بتسرح جنب ضرب التبانة.. مش أنت كنت قائد مركبة فى ضرب التبانة وحتى اللى جنبك ما كانش رابط الحزام يا له ما كانش لابس لبوس الأمان..

الدكتور خائف جدا: أنا معنديش مركبة..

يخرج له الضابط صورة مركب شراعى: صورة أمى دى..

يزغزغه العسكرى: كلم الباشا عدل يا له..

الدكتور متألم

الباشا متنرفز يطلع علبة الجزر يتناول جزرة..

العسكرى يحضر السكينة.:. قص ياباشا..

الباشا: ما بكولش الجزر.. مبطل أمه.. إيه ده..( يكسر جزراية اخرى)

الضابط الاخر : أنت بتكسر جزراية من جزراية يا أخى صحتك!!!!!

الباشا يطفيها فى قدم الدكتور ثم يلقيها على الارض(الدكتور متألم)

يقوم العسكرى يطلع السكينة ويشيل حته الجزراية دى عقب..

الباشا يقول لنفسه: دى رابع علبة جزر النهاردة.. كدة الجزارين فى دمك مش حلو.( الى الدكتور):. قوللى يا ابنى جاوبنى واتكلم بروح رياضية.. خليك لذيذ وخلصنا علشان نخلصك أنا عندى شغل فى اندروميدا والتانى عنده دورية فى اكس أم 13.. أنت فاكر أن أحنا فاضيين لك يا أبنى.

الدكتور: طب حضرتك عايز أيه

الباشا: قولى أنت بتشجع نادى إيه.

. الدكتور: أنا باحب اللعبة الحلوة.

الباشا:. ليه..

الدكتور: لأن أنا روحى رياضية..

الضابط: سيبيهولى بقى أنا لازم أطلع روحه النهارده.. أنت روحك رياضية ياله.. أنت مثبت فى الملفات أن روحك بتفتقد الروح الرياضية وأنت قلت لأ..

الدكتور: أنا ما قلتش لا.

الباشا: أمال صوت مين ده يطلع له ورقة.

الضابط:. يا باشا ما تتعبش نفسك معاه ده روحه رياضية ويقوم ماسك الجزرة وطافيها فيه

طش ما تقول ياله أن روحك رياضية(تسمع صوت ودخان يطلع من على ذقنه.)

الدكتور: طب انتوا عايزين ايه؟

الضابط: أحنا جايين عشان الفيلم هات الفيلم..

الدكتور: فيلم إيه..

الضابط: الفيلم خليك حلو ما تعمليش فيلم..

الفضايح اللى أنت لافف بيه على كل الكواكب السماوية والأجرام يا مجرم.

الباشا:صاحبة الملاليم اللى مكتوب فيه

سبع كواكب يابنى حرام عليك عايزين الفيلم وح نلم الأمور معاك.

الضابط:بسيطة خالص مفيش مشكلة

أنت ح تسلمنا الفيلم وح نعدمك وكل واحد يرتاح..

أنت ح تنام وترتاح وأحنا برضه ح نروح نشتغل ونشقى..

الدكتور: أعمل إيه يا ربى.. يا عم فاروق.. الحقنى يا عم فاروق..

صوت موسيقى: ثانية واحدة يا جماعة عندى رسالة ع الساعة

قطع

م59 نهار\ داخلي

الساعة

فى الساعة عم فاروق .

.( عم فاروق يكلمه بلهجه على الكسار):إزيك يا دكتور يا ابنى.. عامل إيه.. واحشنى..

الدكتور:ياعم فاروق الحقنى ده فيه إليان طلعولى

فاروق:. إلين ايه يا ابنى استنى..

ده أنت واحشنى خالص..

إزيك يا مصيبة.... أنتى ما استخبتيش فى الصندوق ليه..

ح أحطك جوه الصندوق.. أنت يا ولد أنت..

الدكتور: يا عم فاروق أنا عاوز أخلص من الاليانز..

فاروق:. الينز إيه دول يا راجل ده أجنبى أحنا بنتكلم أربى.. أنتى ما بتفهميش

الدكتور:يا عم عبد الباسط طيب سلفنى تلاتة جنيه..

فاروق:. تاخد ورقه بـ 7 جنيه ونص..

الساعة تقول هذه رسالة مسجلة والساعة ستنفجر من تلقاء نفسها بعد إنتهاء الرسالة..

تنفجر ويطلع دخان..

قطع

م60 نهار\ داخلي

البيت امام الكومبيوتر

الدخان يخرج من وجه الدكتور ومن ذقنه ومازالت نار على وجهه

الباشا: ساعتك دى حلوة أنت جيبتها منين أحنا ما عندناش منها

الدكتور: يا أفندم أنا ح أعترف لحضرتك بكل حاجة

وأقولك الفيلم فين وعد منى أنا رقبتى فدا المجرة ..

الباشا: الحمد لله أخيراً بقيت وطنى مجراوى.

. أنت أخيراً مجرى أصيل.. أنت أبن المجرة..

الخير جواك وبحر التبانة وراك.. و لبن اللبانة رواك..

(أغنية وطنية للمجرة مجرتنا أمنا...

تلك المجرة خرجنا لبره بكل مسرة

تتبنى على فترة السجع.. مفيش معرة مع

مادة فيلمية اللبانة جزء من فيلم الكرتون )

الباشا: علشان كده ح نجهز لإعدامك بأسرع طريقة.

. حانكافئك بإعدامك ونشوى أعضاءك ونأكلك أعضاءك المشوية..

أنت مش بتحب نفسك.. صباعك ده لو أتحط قدامك على السيخ

واتشوى مش ح تحبه....طلباتك إيه. تحب كاتشب؟. الطلب الآخير قبل الإعدام

.. الدكتور: أنا ليا طلب معرفى يا باشا..

الباشا: معرفك؟ إيه معرفك دى؟..

الدكتور: معرفى يعنى ايبستومولوجى

أنا عاوز أعرف ازاى أنتو كلكم خرجتوا من شخص واحد بس..

الباشا:حاجة بسيطة

الدكتور: بس أنا شاكك أنك ح تفهمها لى..

الباشا: طبعاً لأنك غبى.. حمار..

الحاجات دى بتتعمل بالمورف يا أفندى.

. وفيه ناس بتعملها بالماتادور..

بس دول اللى معاهم فلوس مش زيك يا معفن

. .الجهاز بتاعك فيه مورف؟..بانتيم كام ده.؟

.احترموا نفسكم وجيبوا اجهزة محترمة

..كنت اعملها لك فى ثانية..

انا حاضطر اعملها فى 3ثوانى

علشان الجهاز المعفن بتاعك..فى 3ثوان

يتجمع الغرباء كما انقسمو الى شخص واحد و يرجع للشاشة..

الدكتور:ثانية واحدة.

اصابع الدكتور فوق الكى بورد.ديليت

.صوت الغرباء:.لا..لا..لالا..هانرجعلك تانى لا..لا..لالا

قطع

م61 نهار\ داخلي

مخزن عم فاروق

المخزن مظلم وتقاطعات اضاءة على الة العرض وبكرات

عم فاروق مسجى فوق الكرسي بلا حراك

الدكتور يدخل المخزن ويندفع نحو فاروق يرفع يده ويتركها لتسقط بجواره

الدكتور يصرخ: لا..لا..لالا ياعم فاروق..لاياعم فاروق..انت الى دخلتنى العالم

وعرفتنى صناعة

السينما على ايدك - يتلفت الدكتور حوله فيري الات العرض والافلام

الدكتور: انا لازم اتمالك اعصابي...

الرسالة لازم تستمر الوصية

أنت كتبتها لصالحى الحاجات دى بتاعة مين

دلوقتى كنز يبدأ الدكتور فى جمع الافلام ويحمل كاميرا 9.5

ينظرله فاروق ويفتح عينيه ببطء بصوت خفيض: وله أنا عايز 600 جنيه فى الكاميرا دى..

لاينتبه الدكتور يمسك احد الافلام
يمسك يد فاروق ثانية ويرميها.. ويشوف النبض من رجله.. ويشوف حدقه العين..

الدكتور: عم فاروق مات هييه..

وأنا ورثت كل الحاجات دى..

أخيراً بقيت مليونير كل مشاكلى اتحلت..

أتجوز على مراتى..

ح أشرب مخدرات ح اشرب خمرة..

ح أعيش حياتى وأجيب عربيات..

ح آكل لحمة كل يوم وأدمنها.. ح اشرب سجاير..

قطع

م62

مادة فيلمية

إعلانات السجاير القديمة..

صوت عبد الخالق يقول :حيشرب سجاير يافندم..

ويكررها ينزل صوت عبد الخالق وصوته يعلو حاشرب سجاير..فى صدى صوت متتال

قطع

م63 نهار\ داخلي

المخزن

الدكتور: آدى الفيلم اللى عمى فاروق

مش عايزنى أتفرج عليه من الأول

الكاميرا دى والشرايط دى

يمشى بجوار فاروق ويشغل الماكينةوقيل ان يبدأ الفيلم

فاروق : وله أنا عايز 300 جنيه فى الفيلم ده ياله..- يلتفت الدكتور باندهاش

عم فاروق:

على الأقل 300 جنيه.. يللا يا دكتور يللا نشتغل..

الدكتور:أنت ما متتش يا عم فاروق..

فاروق: لا مامتش انا بس كنت مريح شوية

الدكتور: انت حى يا عم فاروق.. الحمد لله..

عم فاروق : انت مالك..فكرت ايه.. ؟

الدكتور:كان حلم وراح-

عم فاروق : حلم ولا علم يا ابنى

ما احنا ما عندناش فرق السيما

حلم احنا هنا جوه الحلم

عايز ايه بقى تتفرج على اعلانات السجاير..

مش قلت لك الفيلم ده ما تشوفش..

وبعدين 16 تمشيه على الماكينه 9.5.. طيب

مشيته على ال9,5ازاى..

الدكتور: خرمته من النص..

عم فاروق : علمتك انا الحكايه دى.. .. خلاص..

قطع

م63 نهار\ داخلي

البيت

الدكتور سعيدا جالس امام الطبلية

تدخل عيشه.حاملة اطباق

تضعها امامه تلتفت له:. ريحتك دخان..

ايه ده انت بتشرب سجاير.. هوه احنا ناقصين انا نفس غامة عليا لوحدى..

الدكتور فرحا:بجد؟.

اشا:. انا كده من يومين من شهرين من اسبوعين

من ساعتين حاسه ان فيه.. ان انا مش واحدة.. ان انا اتنين

الدكتور:بس انا ما لمستكيش يابنت الحلال..

اشا: امال مين يا خويا اللى

دوامة

م64

فوتو مونتاج

(صوت اشا والدكتور)

عقيلة راتب وانور وجدى يطفى النور

عقيلة : أنت بتطفى النور ليه.؟

انور: عايزين نقعد قاعدة عاطفية

عقيلة: قصدك نشرب قهوة

يقترب منها

القهوة بتفور..

الحنفية تنقط

وخرطوم الميه يرش ميه.

. والشباك ينفتح

.. والمدخنة.

صوت المذيع مجهدا: كفاية بقى..

دوامة

م65 نهار داخلي

المطبخ

الدكتور وحيدا يحضر القهوة

يرى طبقا مكتوب عليه

مراتك اتخطفت

يسقط الطبق من يديه

يظهر المذيع من الشباك: كان لازم تفتح الشباك الليلة..حبكت

الدكتور غاضبا: هو انا ناقصك

يغلق الشباك فى وجهه

صوت المذيع من بعيدالحقونى ىىىىىىىىىىىىىىىى

صوت ارتطام

قطع

م66 نهار\ داخلي

عمارة عادية من الداخل

مدخل عمارة والدكتور يسير

وهو يعرج وسط العصابة

وهم يؤدون حركات قتالية عنيفة ولايلمسوه

يصعد السلم وكلما مر من احدهم يسقط على الارض

فى أحد الادوار يجد علوية جالسة و عيشه متربطة فى عمود شماعة

علوية:أحلى مني فى إيه أنا وحشة وإلا إيه

الدكتور:أمشى يا ولية..

تنزع علوية الشنب وتقع الباروكة على الارض

علوية: انا بقيت أيمن محب..

يظهر المذيع:معركة شرسة بينهم..

أيديهم قدام بعض.. علوية هيه زعيمة العصابة اللى خطفت مراته...

ولكن غيرانه من مراته لأنها افتكرت أنها السبب.

كمان سمرا. مع ان السمار نص الجمال .

أحلى منها فى ايه إيه.ايه ياربى . اشا فى مربع نمرة تمانية وبتسخن.

المذيع.. مدام كونغوفو بطلة العالم

فى نزاع شرس للدفاع عن لقبها

مدام كونغوفو تتحول إلى كابتن إيمن.. ليه يا كابتن سبت بلدية المحلة..

تترك علوية الدكتور وتتجه للمذيع: هوه انما دى

أنا باعترف له بالفضل.. أنا منه وصلت للاحتراف الداخلي

اللاعب المحترف ما يهمهموش غير الفلوس..

اشا تفك نفسها وتحتضن الدكتور

الدكتور يحاول الاقتراب منها

علوية:.. يا أخى عندى مقابلة يا أخى..

يا أخى بناكل عيش من المقابلات دى.

. دى قناة الأرخبيل بيدفعوا بالدولار يا معفن..

المذيع : خللى عندك روح رياضية

وانتقالى للمنصورة هو سبب النقلة الكبيرة

للأحتراف الداخلى فى دمنهور.. بس أنا لازم أنوه
.ان. دي رياضة يا أبا أكل عيش ( تلتفت للدكتور)

سيبنالك السيما خدها وأمشى..

الدكتور:طب والمعركة دى..

علوية: نتقابل فى فيلم تانى بقى يا أخى..

يلا يا أستاذ ابن امبارح خللينا فى موضوعنا.

. أنا شايف أن مشكلة مصر إنعدام الروح الرياضية والتعصب

الدكتور و اشا يخرجان


قطع

م67 نهار\ خارجى

امام مخزن فاروق

الدكتور واشا فى فى شارع الموبيليا

امام خرابة مكان مخزن فاروق يندفع الدكتور نحو الخرابة

الدكتور: فين عم فاروق.. خرابة.... فين عم فاروق

المذيع وهو بائع سريح يمر بهما:.. عم فاروق مين يا دكتور؟

......دى خرابة السينما

الدكتور: كان عايش جوه هنا..

المذيع: جوه خرابة السينما..؟

آه أنت تقصدعم فاروق بتاع سيما التتويج

ولا بتاع ركس ولا الهامبرا ولا خورشيد

قطع

م68

كليب غنائى

تبدأ رحلة السينمات مع أغنية تسرد

واقع وتاريخ السينما

( تانى مصدر للدخل القومى)

( ياما صدرنا أفلام.. شرق أفريقيا كانت طالبة أفلام مصرية)

..شرق أفريقيا طالبة أفلام عربية

..( أندونيسيا طالبة أفلام مصرية)..( أفلام أفلام أفلام.)

ارقام واحصائيات واحلام السينمائيين..

الدكتور:.انت فين عم فاروق انت فين يا راجل أنت

تتر النهاية

تم بحمد الله

23-4 2002

اسامة القفاش

محمد حسان

18 comments:

Malek said...

انتهى السيناريو
في انتظار اراء جميع الاصدقاء
انت فين يا ي؟؟؟
دكتورة ايمان؟؟؟
دكتور خالد
الاستاذة شهروزة
من تتخيلون من الممثلين للادوار المختلفة
ممكن تفكروا في ممثل او ممثلة تلعب اكثر من دور ايضا
خالص التحية
اسامة ومحمد

Immature said...

د.اسامة ..معلش انا تغيبت الفترة الماضية لان كان عندى شغل كتير الصبح وبعد الضهر كمان ولم اجد اى وقت لتصفح النت بشكل لائق غير مخل.
المهم .. انا قرأت السيناريو كاملا النهاردة واعتقد دى الميزة الوحيدة لغيابى الفترة الماضية وهى انى اقرأ العمل كاملا بدون تقطيع.
ضحكت لقفشات كثيرة فى النص .. دايما اعمال الفانتازيا بسخريتها المريرة بتضحكنى .. وزى ما اللى قبلى عقبوا وقالوا .. اسم رأفت الميهى قفز امامى فى اكثر من مشهد.
طبعا العبدلله لا يفقه شيئا فى فنيات كتابة السيناريو ولذلك اتكلم كمشاهد للعمل وليس بقارىء للسيناريو .. ميزة القراءة انها خلتنى اخرج العمل فى دماغى واتخيله حسبما يروق لى .. ولكن الغريب اننى لم انجح فى تشخيص ابطال العمل !! وعلشان كده هيبقى صعب جدا انى اقول رأيى فى تخيلاتى للمثلين المطلوبين للادوار .. بس اكيد حضرتك واستاذ محمد تخيلتم ممثلين بعينهم عند كتابة تلك السطور بالرغم من صعوبة اختيار ممثلين لان اللى بيعرفوا يمثلوا كبروا على الادوار دى .. والجيل اللى شغال سينما دلوقتى مش لايق خالص فى الاعمال دى

عموما انا هاقول الكام اسم اللى ربنا فتح عليا بيهم ورزقى على الله

اولا .. انا من ساعة ما شفت يحيى الفخرانى فى الحب فى التلاجة وانا مش قادر اتخيل فيلم فانتازيا من غيره !!
لكن طالما ان سنه اكبر من المطلوب لدور الدكتور هاختار خالد النبوى ولو انى مبستلطفهوش

- لدور عم فاروق انا اقترح الممثل اللى اسمه احمد عقل

لدور المذيع الغتت اقترح الممثل اللى قام بدور مذيع فى فيلم "علشان ربنا يحبك"

لدور محمد الخراشى اقتراح اسناد الدور للكاتب الصحفى ابراهيم عيسى

لدور اشا اختار هند صبرى
لدور مدير التاكسى اختار غريب محمود .. هو الله يرحمه توفى من اسبوعين تلاتة ...بس السيناريو اتكتب فى 2002

لدور الضابط الاليان اختار الممثل عازف الربابة فى فيلم علشان ربنا يحبك

اما باقى الشخصيات فبعضها رصدت لها ممثلين اعرف اشكالهم ولا اعرف لهم اسما .. وبعض الشخصيات عجزت عن اختيار ممثلين لها .. الشغلانة دى صعبة اوى !!

Ossama said...

ي حبيب قلبي
مش ممكن انت فعلا فنان
انت م الاحرار يا يسري
احمد عقل اختيارنا الاول
لدور عم فاروق
خالد النبوي اختيار معقول برضه
آشا الحقيقي عايزين لها ممثلة سمراء
المذيع الغتت سيد الرومي
لكن لسه في ادوار كتير
بس خد بالك من فكرة ان ممكن واحد يعمل اكتر من دور
المهم سؤال مهم جدا
كويس انك ضحكت
بس قول لي عجبك العمل ككل؟؟؟

طبيب نفسي said...

أسامة..

طبعا أنا قريت السيناريو من مدة وقلتلك رأيي فيه.
وغالبا اتكلمنا في موضوع اختيار الممثلين.
لكن نختار تاني خصوصا أني نسيت انا اخترت مين.
الدكتور: شريف منير
عم فاروق: لطفي لبيب
المذيع الغتت : أحمد عقل
مدير التاكسى : الممثل اللي كان طالع بدور زوج آثار الحكيم في النمر والانثي بيصلح راديوهات ويقول: قالولي طيع يخصة آدي اليخصة أهه.. مش فاكر اسم أمه إيه.
محمد الخراشى : خالد صالح
آشا: جليلة محمود أو إنعام سالوسة .. لا بجد ممكن هند صبري أوالبنت الطويلة اللي كانت بترقص باليه في فيلم اللمبي الاولاني مش فاكر اسمها.
الضابط : خيري بشارة

الفنان محمد يوسف الله يرحمه كان ينفع جدا لدور عم فاروق .. أنا كنت بحب تمثيله جدا .. عم شكل بتاع زمان.

صباح الفل

Malek said...

طبعا استذة يا دكترة عم محمد يوسف الله يرحمه كان اختيارنا التاني لعم فاروق
و لكن كان وقتها عيان
لطفي لبيب مشكلته الحنجوري احيانا
المذيع سيد الرومي معرفش تعرفه ولا لأ يا وليد بس هو ممثل كوميديان رائع
آشا كان المفروض اي واحدة سمراء زي ويتني هوستون مثلا
لا بجد كان فيه واحدة سمرا اسمها جيهان و عملت شريط اسمها فيه حليمة و كان فيه واحدة تانية برضه
المشكلة ان الجمال الاسمر صعب ان الناس في بلاد السمار تقتنع بيه
لكن الفكرة كانت كسر التابوهات
شريف كان ممكن يبقى رائع بس هو كبر ع الدور

Immature said...

د.اسامة .. العمل ككل عجبنى طبعا بدون كلام
وان كانت قراءته مرهقة لامثالى .. او يمكن يكون علشان اول مرة اقرأ فانتازيا ومشوفهاش على الجاهز على هيئة فيلم بالممثلين والاضاءة والموسيقى ورتوش المخرج وتوجيهاته للمثلين. على فكرة موسيقى سارق الفرح لراجح داوود اتنططت كتير فى دماغى وانا باقرأ النص
...
لكن ارجع واقول ان النص ذكى وبيحترم المشاهد ويفترض فيه الحرفية وده فى حد ذاته بيدينى كمشاهد -او قارىء فى حالتى- احساس غريب بالتميز والرضا عن النفس لانى قاعد فى معهد السينما او او احد مراكز الفنون وباشغل مخى وانا باتفرج على السيرة الذاتية لفنان

شكرا يا دكتور على البوست ده :o)

****
بخصوص الممثلة اللى هتقوم بدور اشا .. هنجيب منين ممثلة سمراء !! ده مفيش عندنا ممثلة سمراء فى بر مصر كله حتى لو كان اصلها نوبى !! كلهم اتحولوا بقدرة قادر لممثلات شقر او هم فاكرين كده وبيتعاملوا على هذا الاساس

*****
د. وليد
تقصد مين بالممثلة الطويلة بتاعة الباليه ؟؟
حلا شيحة ؟؟ وهى فعلا كانت بترقص باليه وهى عيلة صغيرة .. ولا نشوى مصطفى اللى قدمت فاصل من الرقص الايقاعى فى آخر الفيلم ؟؟

الممثل المقترح لدور مدير التاكسى ده ممثل مسخرة ليه مقولة مأثورة فى فيلم 55 اسعاف
كان بيقول وهو بيطلب فدية علشان يرجع الوزير المخطوف
"عاوزين خمسة وخمسين مليون دولار وطيارة تودينا الصومال "
ولو عملتوا اى حركة هنفجر الطيارة

Ossama said...

ايماتيور الجميل
اشكرك كثيرا على الاطراء
بخصوص الممثل بتاع مدير التاكسي
احنا كنا بنفكر في ان ممثل واحد يعمل الخراشي ومدير التاكسي و علوية وسامي الشامي والضابط الفضائي والخليفة وممثلة واحدة تعمل سكرتيرة الخراشي و مرات الخليفة و مذيعة المستطيل
وده لسبب اخراجي هو توضيح فكرة ان المجموعة فكرة واحدة
وسبب تكاليف او انتاجي هو ضغط النفقات بالرغم من الممثل ده بالذات او ربما لان الممثل ده بالذات كان ببلاش
او مساهمة منه في العمل اللي عجبه
جدا
الممثل هو الممثل الجميل احمد كمال

mohamed elbanna said...

انت بجد جبار يا دكتور اسامة
كل مدونه ليها لون وتخصص وكلهم محترفين
أنا استمتعت بالقصه لكن ماليش فى الممثلين المصريين
وصباحك زى الفل ان شاء الله

Ossama said...

يا سلام يا محمد انت منور بجد
عجبك السيناريو؟؟
دي شهادة اعتز بيها يا جميل
المدونة بتاعة حضرتك جميلة جدا يا محمد بجد و موضوعاتها رائعة و ردودك شديدة الذكاء
وطول عمرك يا جميل منور
سلم لي على ايهاب كتير

أبوفارس said...

د.أسامه..أنا بجد ماعنديش خبره بقراءه السيناريو وأعتقد أنها فن وخبره وتختلف عن قراءه الروايه والقصه القصيره..لكن وعلى قدر معلوماتى وذوقى المتواضعين..أولا أنا ضحكت وبالذات فى الجزء اﻷخير..وحسيت بالمجهود المبذول فى غزل العمل كله من أسقاطات على مشاهد معروفه ﻷى متابع للسينما المصريه لنقد حاد خفيف الظل لنماذج من اﻷرزقيه والجهله اللى دمروا السينما المصريه حاليا..حتى كصناعه..
مش عارف ليه الموضوع كله فكرنى بفيلم أمريكى أسمه..
Flaying High
أظن أنتاج أواخر السبعينات وكان عباره عن تهريج على موجه أفلام الكوارث
Airport 1,2,3.....etc.

اللى ضربيت السينما ساعتها..الفيلم ده معتمد على النكته البصريه فى حين أنك تعتمد أكتر على الكلمه..أو أنا ماقدرتش أحول السيناريو الى صور ولقطات زى ماهو مفروض..بس خلاص..
بالنسبه للممثلين وتوزيع اﻷدوار عافينى المره دى أنا معلوماتى فى الناحيه دى وقفت عند أحمد زكى ويسرا..هناك جيل كامل لاأعلم عنه شئ....
مين بقى عم تاكسى ...
تحياتى...وصباح اللبن الصابح....خالد

Ossama said...

د.خالد
طبعا الفيلم اللي بتقول عليه ده من الافلام اللي كانت في دماغنا واحنا بنكتب
طبعا في مشكلة في التحويل الى بصري
لان البصري هنا يعتمد على شغل تسجيلي وهواة الخ
ناهيك عن الجو الفانتازيا
مش مهم الممثلين يا عم كتر الف خيرك
غريبة انك معرفتش عم تاكسي السريالي بتاع السريالية اللي مسك حاجات كتير في الثقافة
ولسه ماسك برضه
على فكرة مش زي الواد شريف بتاع قلة الادب والاباحة متخليش دماغك تروح لبعيد بس هو برضه بيمسك ولسه ماشك

أبوفارس said...

عرفته طبعا م اﻷول..بتاع الورد..والحجاب..فاروق-يجعل كلامنا خفيف على بتوع لاظوغلى-حسنى..بس كنت عايزها تيجى من حد تانى..ياله ..على فكره أنا معايا باسبور كندى..حمايه يعنى..!!

Ossama said...

لا مش هو
بس تبعه
تلميذه في كل حاجة وعامل فيها ناقد
اصل العين متعلاش على الحاجب

Ossama said...

استكمالا هو مش فنان
بس كان ماسك منصب فني كبير قومي
وبعدين دلوقتي برضه مازال ماسك

.:.-=- ELGaZaLy-=-.:. said...

جميلة اوى بجد انا اول مرة ازور مدونتك واشوف الجمال
و كلة...

بجد جميلة اوى ,.اوى

Malek said...

الغزالي سعيد انها عجبتك
اشكرك على التقدير
اسامة القفاش
ابو مالك ويحيى

Anonymous said...

مساء الخير
ليك عندي تعليق على تعليق
بخصوص بحثك حول نصوص نجع حمادي
ياريت تكون هناك امكانية الاطلاع على هذا العمل
تحياتي
شريف الصيفي

Ossama said...

اهلا يا استاذ شريف
انا اسمي اسامة القفاش
و مالك ابني
عمره سنة واحدة
مكنش موجود ايام البحث
الحقيقة النص مش متوافر عندي
وانا وصلت لمدونة حضرتك عن طريق اني كنت ابحث عن اسمي على جوجل فوجدت حضرتك مشكورا قد اضفت مدونتي لقائمة الروابط الموجودة
عند حضرتك
ممكن ابعت لحضرتك ملخص البحث على اي ايميل تحبه وممكن حضرتك تبعت لي على ايميل اسامة القفاش الموجود في المدونة الاساسية
مقالات اسامة القفاش