Monday, February 05, 2007

خليك سعيد المشاهد 11الى 29

م11 نهار\داخلى

مخزن فاروق

كلوز اب الة العرض

يتسع الكادرمن البكرة الى الفيلم

( ضربة القدر)مشهد لليلي مراد ويوسف وهبي تدخل عليهما سامية رشدى

فاروق: امورة قوى سامية رشدى

الدكتور: هو الفيلم ده صامت .....

فاروق : لا الماكنة اللى صامتة

الدكتور: دى ليلي مراد.........

فاروق: اللى ع اليمين يا دكتور

الدكتور : معرفهاش

فاروق: تلقاك عارفها وشفتها ألف مرة

بس بعد ما تخنت اصلها صغيرة قوى فى الفيلم ده

سامية اتجوزت ابراهيم مراد المنتج قريب ليلي مراد

اللى ابوها زكى مراد كان ملحن كبير قوى

هو اللى علم الواد منير اخوها التلحين بس زكى بطل

وبقى من محاسيب الحسين

فاروق: ما هما دول كلهم كانوا يهود

الدكتور: اكيد الفيلم ده ضايع

فاروق: ضايع ايه؟ مافيش فيلم بيضيع

الدكتور:احنا لازم نعرف الناس بيه

قطع

م12 نهار\داخلى

المطبخ

الدكتور واشا يأكلان أكل خفيف

الدكتور: النهاردة لقينا فيلم ضايع بطولة سامية رشدى

اشا : مين ساميه رشدى؟

الدكتور: ممثلة قديمة بس انتى اكيد عرفاها تلقاكى شوفتيها فى الف فيلم بس بعد ما تخنت

كانت بتعمل ادوار الام... ودى قريبة ليلي مراد

( فيلم سر طاقية الاخفاء )

اشا: اه هى دى بشوفها كتير بس مباعرفش اسمها

ازاحة

م13

فوتو مونتاج

لقطات ثابتة متوالية لممثلين قدامى كبار معروفين و غير معروفين
سعيد خليل محمد فرج شرفنطح ثريا فخري عبد العزيز احمد احمد علام

محمد كامل محمد ابو السعود زينب صدقى عزيزة امير نوال بدرية رأفت

وغيرهم مما يتوفر لنا اثناء التصوير

لقطة أبيض واسود للممثل سيد الرومى مكتوب عليها اسمه تتحول الى لايف يهز رأسه ويقول ابن امبارح

قطع

م 14 ليل\داخلى

امام الكومبيوتر

الدكتور جالسا امامه كتاب ضخم مكتوب عليه( كل حاجة عن أي حاجة فى فن السيما)

صوت المعلق: كل حاجة عن أي حاجة فى فن السيما

للناقدالمؤرخ السينمائى والعسكرى والزراعى والصحراوي والمسرحى

و زير الشطرنج الاسود

المندوب المنوب لوزارة الزراعة بكاليفورنيا

الخبير المنتدب لدى الادارة الفرعية بمصلحة الكيكياء العمومية باتحاد الكامبازيك

يقلب الدكتور الصفحة

يمد المعلق اصبعه ويثبت الصفحة: استنى

واحد يقولى ايه هو اتحاد الكامبازيك

اقوله احب جمهورنا الواعى اللى يسأل

ده اتحاد مابين فنانى الاقاليم

فى مقاطعات الكا كيتكات والامبا امبابه وزى زنين اما الايك الاخرانية فهى كفر طهرمس

وهى الكامبازيك وبنعرف لغات وبنفهم فى الافرنجى اقلب الصفحة بقى

يقلب الدكتور الصفحة

المذيع:رائد المشاهدة الاول بسينما الفانتازيو الصيفى

رئيس جمعية محبى اكل الفشار فى الاستراحات العمومية

زميل جمعية سيما اونطة الملكية وسيما بفلوس

ضيف دائم على موائد الرحمن للفنانة المبدعة فيفي عبده

قطع

م15 نهار داخلى

مكتب المؤرخ المدعى

صوت المعلق :المؤرخ الناقد الكبير.. محمد الخراشى

محمد الخراشىخلف مكتبه وامامه لافتة كبيرة لامعة المؤرخ الناقد الكبير محمد الخراشى

الخراشى مبتسما: انت جاى فى المكان الصح -تدخل السكرتيرة-

الخراشى: نانى هاتى للاستاذ -

الدكتور: قهوة سادة

الخراشى: لا هاتى نسخة من كتابى الاخير

تميل السكرتيرة بجواره وتخرج كتابا فخما مجلدا علي الغلاف صورة ملونة كبيرة ل الخراشى

تناول الكتاب للدكتور

الغلاف مكتوب عليه صفحات من جهاد المجاهد الكبير

بالقلب واللسان والجوهرة

الاستاذ العالم العلامة والحبر الفهامة محمد الخراشى

بقلم المجاهد الكبير بالقلب واللسان والجوهرة

الاستاذ العالم العلامة والحبر الفهامة محمد الخراشى

الخراشى: نانى عبى فورمة النقد سبع مقالات

واحدة لمجلة الفشة لو فرانسيه والمونبارو ايتاليانو

والجوهرة المالطية والزحالف البحرية -

نانى: السحالف

الخراشى: نعم؟ الزحالف اسمها زحلفة مش سلحفاة...لولا انك جديدة يانانى

نانى : اشكرك..... يا خراشى والباقى

الخراشى: (يغمز ) بعدين

- نانى : امرك.... يا خراشى( تخرج)

الدكتور: بخصوص فيلم سامية رشدى

الخراشى: الممثلة دى زى معظم السادة دول كانوا يهود

السينما عملها اليهود لتخريب البشرية..

الدكتور:الفيلم ده حضرتك تاريخ و هى برضه مصرية

الخراشى: أنت جديد فى مجالك..

كانوا بيحاول يتخفوا.

الست سامية بتاعتك دي كانت بتشترى سنتوتش فول عند محمد أحمد,

بتشترى منه لما كان اسمه بنيامين..

بص 1يناير 45 مش 14 يناير زى وليد ما بيقول..

صهيانه.. لعلمك أنا عارف كل حاجة وعندىالمستندات..

وبعدين.. أنا 54 دلوقتى داخل فى التمانينات

ولسه بالعب مافيش غيرى

انا وبوشكاش هو مات بس ربنا يديله له طوله العمر.

الدكتور: الكلام ده كله غلط اغلبهم كانوا مصريين زى وزيك وبيحبوا البلد

الخراشى: انت مين ياله قالك الكلام ده؟

يقف الدكتور ويسير خارجا: عم فاروق...تعرفه

الخراشى متعجبا يفكر: عم فاروق

يمد يده يرفع سماعة التليفون

قطع مع استمرار الصوت للمشهد التالى

م16 نهار\ داخلى

المخزن

صوت الخراشى من خارج الكادرايوه ياباشا لقيتلك واحد من اياهم

اللى بيعبثوا فى تاريخ الامة وبيشوهوا انجازات مصر الحضارية

.....اسمه فاروق ومعاه واد دكتور جاهل..

فاروق يلف فيلما اما الدكتورفيقوم بلصق فيلم 8 مللى على البرس

ينظر لعم فاروق ويبتسم له

قطع

م17

مادة فيلمية

افلام نادرة للنشاط الاجتماعى المصرى فى الاربعينات

يمثل اغلب طوائف الشعب المصرى بتنوعه الثقافى والدينى الاجتماعى فى ذلك الوقت

بحيث يعرض حرية المجتمع وينفى فكرة اضطهاد اية فئة دينية

يليه لقطات نادرة عن حرب اكتوبر من احد هواة السينما

قطع

م18 غروب\خارجى

نادى اليخت

الدكتور واشا جالسان امام البحر مباشرة يراقبان الجمال

الدكتور: مبسوطة يا حبيبتى

اشا : ( حالمة) ام

الدكتور : ولسه الحياة هاتدينا اكتر واكتر

انا شايلك مفاجأة..... انا بكرة نازل مصر

اشا تبرق عيناها فرحة: TAXI ؟؟؟؟

الدكتور: ايوه TAXI

اشا : كان نفسى تعمل كده من زمان

قطع

م19 نهار\داخلى

لافتة بيضاء مكتوب عليها بالاحمر TAXI مكتب المدير

بجوار اللافتة المدير مطأطئ يبحث عن شئ

لا يظهر الاظهره

يدخل الدكتور ويقف منتظرا يشاهد اللوحات السريالية المنتشرة بالمكان

فجأة يعتدل المدير ويلتفت نحو الدكتور :(بنعومة حادة).. إيه يا أخى..

مفيش إحساس.. مفيش دم.. ما تخليك حسيس

إيه دكانه من غير بواب.. ما فيش حاجة شايفها.. مفيش حد مالى عينك.. أنت مين؟؟؟

الدكتور :أنا الدكتور..

المدير مقاطعا: دكتور فى إيه ورينى أطفال نسا وولادة باطن شرج قول إيه..

الدكتور: لأ أنا دكتور فى المنطق

المدير: منطق؟ وكمان كذاب دكتورعندك عيادة ؟

طيب بلاش بتعود المريض؟ ما هى العيادة نوعين عيادة الطبيب وعيادة المريض

انا مريض محتاج حد يعودنى زرتنى ؟ عودتنى

طب بلاش يعنى كذاب مش عارف ان الكذاب بيروح النار

ما تخافوا من ربنا يا اخى خافوا من ربنا

طيب ما تخافش من ربنا خاف من الحكومة دى ممكن تقطعك عشان اًنت بتزور

الدكتور: يا اًفندم انا جاى عشان مشروع حماية الابداع العقلى المصرى ..

المدير: مصرى عقل ابداع انت سريا لى حقيقى قول كلام جميل جداً انت دكتور فى ايه

الدكتور: فى منطق الكمبيوتر

المدير: او...كمبيوتر وعقل وابداع ومصر ..

انت باين عليك متمرد سريالى حقيقى اسمك ايه - يهم الدكتور بالاجابة-لا ماتقولش

انا ح اقولك استنى سيبنى

نرجس اسم جميل فتان زهرة مرحة بتشع سعادة

ده اسم ولد وبنت ما تتكسفش مفيش حاجة - الدكتور مذهولا- مالك يا دكتور

انت مش مرح خليك سعيد خليك مرح مش عاجبك نرجس -يهز الدكتور رأسه- خلاص خليك سعيد

توتى تعال

يدخل توتى وهو شاب اسمر خشن يرتدى بدلة فخمة

توتى للدكتور: بزمتك يافندم ده شكل واحد يبقى توتى

الدكتور: الحقيقة لا

توتى(بخلاعة شديدة وهو يستدير): بس انا توتى ايه رأيك

الدكتور: يانهار اسود انا اية جابنى هنا طيب استاذن انا-

المدير: استنى يادكتور .

توتى موجها كلامه للمدير: ما كتبناش البدلات..

المدير: لمؤاخذة يا دكتور

بدل مقابلة ناس كذابة لا مش قصدى عليك يا دكتور

المقابلة دى عارفينها مالهاش لازمة

مش قصدى عليك يا دكتور

مقابلة ناس كدابة بدل مقابلة ناس معفنة ومالها ش لازمة

وبدل المجتمع والناس وبلدى وحبايبى أكتب يا ابنى بدل حب

(يرن التليفون)

يتحول المدير الى شخصية جادة جدا بيروقراطية : ايه هى نهيبة

ماينفعنيش التسيب ده كل الاوراق لازم تبقى مستوفية الامضاءات والتمغات الرسمية

وبعدين تجينى انظر فيها..حرام عليكوا يا عالم دى امانة

اخرس ( يغلق التليفون)(يعود المدير لنعومته) ماقولتليش انت جيت ازاى ؟

الدكتور: انا جاى بالاوتبيس حضرت

- المدير: اى جوتوسكول باى باس

ايتس نايس تو سي يو افتر ذا لونج سمرهوليداى

شفت انا اعرف لغات كتير

بس اكتر لغة باحبها لانها مرحة الفرنساوى

باموت فيها يادكتور شاعرية ركيكة بتحب الفرنساوى يادكتور ..

الدكتور: ماعرفوش ..

المدير: خسارة لازم تتعلمه (يتكلم عبر الجهاز بجواره) توتى هات للدكتور حد يعلمه الفرنساوى

(موجها كلامه للدكتور) انت جيت ازاى بقى .؟

الدكتور: قلت لحضرتك بالاوتوبيس .. والمشروع ....

المدير: شوف يادكتورانت لازم تعرفنا اكت

ر أولا اسمنا TAXI دا اختصار (تيجى اديك كام قسط)

احنا طبعاً ماعندناش فلوس كتير تحت ايدينا

لا نك عارف هنا على طول بنسدد ثمن البضاعة.

.واحنا مصارينا فى السوق شوف يادكتور ..

عندنا تقدر تاخد فنلتين بسعرفانلة واحدة

انا حا اديك بريزة ورق تمشى نفسك بيها

-الدكتور:ما تمشيش

المدير: كذاب انت جاى بالاتوبيس يادكتور

بتمشى فى الاوتبيس عيب عيب قوى قوى

انا باديهالك علشان تروح بيها شكلك حثالة مش ح تعرف تروح

انت فى جيبك كام يامعفن

لاانت سعيد ولا مرح وغم

فقرى ايه مش عايز تبقى مرح

ليه؟ انتوا اللى فقرتو البلد الغم ده بيقطع الخميرة من البيت انتوا فقرتوا مصر

قطع

م20

مادة فيلمية

لقطات نادرة تسجيلية قديمة

موسيقى فانتازية تمهد للمشهد القادم وتستمر فيه

م21

كليب استعراضى غنائى

-الدكتور فى ليته ينقر على الشراعة

- يدخل متلصصا

- اشا تغنى خليك مرح خليك سغيد

-الدكتور يحتضنها ويشتركان فى الاغنية

داخل الكليب لقطات كوميدية من افلام الهواة

فوق السطوح – دكتور السنان – الراجل والست

ريستاتيف لعم فاروق معلقا على الافلام غنائيا

المدير والمذيع يشتركان فى الاغنية

قطع

م22

مادة فيلمية

لقطات من فيلم نادر

نابليون – ابيل جانس – النسخة العربي

م23 نهار\داخلى

المخزن

عم فاروق والدكتور جالسان يشاهدان فيلم نابليون

عم فاروق: نابليون أهوه مش عارفه؟

لازم الناس تعرف أننا صورنا نابليون وقت الحملة الفرنسية..( ينظر للدكتور بطفولية)

الدكتور:لا يا عم فاروق.. الفيلم ده متصور سنة 26 النسخة العربى دى حاجة كبيرة قوى..

عم فاروق: أنت عايز تقولى أنهم ما كانوش يعرفوا عربى أيام الحملة الفرنسية..

الدكتور:لا ماكنش فيه سينما أيام الحملة الفرنسية.. لأنه ما كانش فيه كهربا..

عم فاروق: أنا شفت فى التليفزيون مسلسل كان أيام محمد على وكان فيه فونوغراف بالكهربا

الدكتور:.. ياعم فاروق أنت جميل فى الفن وفى الخيال..

الدكتور ينظر نحو فاروق فيجده نائما , يأخد بكرتين ويخرج..

قطع

م24 ليل\ داخلى

البيت

الدكتورفى البيت بمجرد ان يفتح الباب حاملا بكرات فيلم تظهر اشا منفعلة: توك ماجيت وإيه السينما دى؟

الدكتور: ده فيلم نابليون

اشا: ياماجاب الغراب لأمه قطيعة تقطع نابليون على سنينه

أنت ما بتشوفش الأفلام ياراجل

ما الأفلام فيها ناس بتاكل وناس بتشرب وناس بتحب وترقص وتقتل

وأنا ليا عندك شهر عسل أدينى يومين منه - الدكتور يتركها ويدخل قائلا: هو انا قصرت

يركب الماكينة وعليها فيلم نابليون.

ويجلس على الارض ويسترخى تدخل عليه فى شاريوه طويل

وتحمل صينية عليها اكل الاضاءة خافتة الا طبق بليلة

مضاء من الداخل الموسيقى حتى نهاية المشهد تحمل معنى التوتر والجريمة

- اشا:. أنا جبت لك عشا

الدكتور نائم يستفيق من نومه تجلس بجواره ترغمه على الاكل- ما بين الدلال والحب والتحكم-

ينام اثناء الاكل موحيا انه مات تنظر له مبتسمة ,

تحمل الصينية الى المطبخ وتغسل الاطباق بعناية وتتخلص من الكوب فى الزبالة

وهى بين الفرح والحرص ترتدى جوانتى المطبخ البلاستيك وتعيد التنظيف

تحمل سكينة حادة لامعة كبيرة وتسير الى حجرة النوم

دوامة

م25 نهار \داخلى

فلاش باك

وجهان متواجهان الدكتور

وقريب اشا: أنت عاوز كام

علشان تسيب البنت اللى أنت طمعان فيها.

شوف من الآخر كده يا دكتور أنت طمعان فى فلوس البنت

والقرشين اللى بتاخدهم من الشركة علشان هيه مرتبها بتاع 400 جنيه

تأخذ كام 100 جنيه وتتكل على الله.. احنا ما بناخدش منها حاجة

وجه الدكتور حزينا

دوامة

م26 ليل\ داخلى

الحجرة

وجه اشا تشاهد فيلم نابوليون تتجه نحوه حاملة السكين تعمل بلاك على الكاميرا..

قطع

م27

مادة فيلمية

ظهور تدريجى..

فيلم

قضية اليوم

جزء النقاش حول حرية المرأة

قطع

م28 نهار\ داخلى

مكتب الناقدة علوية

علوية خلف مكتبها,عجوز شمطاء لم تحلق شاربها وذقنها منذ اسبوع,

تجلس مواجهة للدكتور تتحدث بانفعال:مفيش حاجه...

للمقارنة بين حرية المرأة دلوقتى وزمان

زمان كانت أحسن حتى ولو من ورا الياشمك..

المقصود أى مرأة.. المرأة الآن ولا المرأة زمان..

وبعدين نقصد حرية المرأة بدون انضباط يعنى زى الغرب المنحل كده الإباحى..

والإ تقصد حرية ؟؟؟ المرأة ؟وعادتها؟ وقيمنا.. واحدة زي كومل..

أنا عندى ولادى.. أنا مثلاً جميلة شابة صغيرة..

وأحلف لك من يوم ماجبنا التوأم مالمسنى..

لازم برضه يا حبيبى نحدد المصطلحات..

لازم نحدد كل حاجة.. كل حاجة لها حدود..

وبعدين الحدود دى بقى ممكن تتساوى.. يا دكتور

طفل صغير يقتحم المكتب:أنا جاى.. تيتا تيتا..

علوية: اسكتوا أنا با شتغل..

طيب يا حبيبى

(للدكتور).. على فكرة أنا أسم الدلع بتاعى توتى

للطفل) خد أقرالى الورقة .. فى الجورنال مش عارفين يجمعوا واقفين على الجملة..

يأخذ الولد الورقة ويمسك قلما ويشخبط فيها

علوية:.. بنتى اتجوزت وهيه عندها 12 سنة..

وأنا خلفتها وأنا عندى 11 سنة.. أصل احنا بنتجوز بدرى قوى قوى

عشان حلوين قوي قوى

يقوم الدكتور مغتاظا ولم ينطق كلمة واحدة

علوية:.. ما لك مستعجل..

ما تلاقيلنا يا أخو يا فيلم عن أبو الهول وسعد زغلول ونعرضهولك ..

آه فيلم عن هدى شعراوى وسعد زغلول.. وهمه الاثنين كانوا بيحاربوا مع بعض الاستعمار الانجليزى

والفرنسى..و الطليانى ولا ده كان فى بلد تانية..

وبعدين غلبوا حملة فريزر..

يخرج الدكتور تقوم خلفه تحاول اللحاق به: تعالى..

الدكتور وهو يجري: مش جاى.

علوية تسد الكاميرا بصدرها: بأقولك إيه.. تعالى.. ياولد....

مسح

م29

كليب موسيقي

مجموعة بنات جميلات جدا تجري خلف الدكتور

ويبدأن فى مطاردة الدكتور..

بالتوازى مع لقطات الحرس الملكى

الكبارى القديمة والجديدة

( المذيع يرتدى فستانا ويجرى خلف الدكتور و يحمل بوقا)

سلم نفسك انا بنت خالتك

سلم نفسك يا دكتور يا مهراجا

هايضربوك بالنار

يبدو الانزعاج على وجه المذيع ويمسك قلبه: لأ لأه لأه ( صدى صوت)

صوت اطلاق نار

قطع

7 comments:

Malek said...

د.ايمان فينك؟؟
على فكرة آشا هو النطق النوبي لعائشة
زي فاتا ماهو النطق النوبي لفاطمة
تحياتي
اسامة

أبوفارس said...

أنا معاك ومتابع بس مستنى الباقى..أولا ضحكت على طبق البليله اللى منور من جوه..دى أفيه على هيتش طبعا بس عالى شويه لازم المتفرج يكون عنده خلفيه كويسه..معظم أسماء الممثلين لاأعرفها أجتمال أعرف الوجوه..الشئ بالشئ يذكر فيه فى مدونه اٌحد مجموعه صور جميله لعائلات "مصريه" مسلمين ويونان ويهود وأقباط جميله جدا
You can not say who is who

جميل جدا ولنا عوده تحياتى.....خالد

Malek said...

صباح الفل ياابا فارس
الف شكر يا دكتور خالد على الملاحظة الجميلة ولو انك عودتنا عليها
اصل حدوتة السيناريو ان محسوبك العبد الفقير لله تعالى
محب جدا لجمع الافلام القديمة
وعاشق للسنيما الصامتة وقد قمت عام 1992 بتحقيق وترميم فيلم مصري طويل من عام 1929 اسمه مصطفى او الساحر الصغير و اتعرض في التلفزيون وعمل ضجة
المهم تجمعت عندي ومن علاقاتي كمية مش بطالة ابدا من هذه الافلام
ناهيك عن قصص ومعلومات عن هواة السنيما في كل مكان في مصر
محمد حسان كانت عنده فكرة عمل فيلم وبرنامج و
وزي ما قال تولكين الفيلم اتكتب اثناء القص والحكي
و اكل السندوتشات الغريبة في شوارع الاسكندرية القديمة والجلوس على البحر على سقالة نادي اليخت في الانفوشي
واتكتب باننا كنا بنحكي لبعض ونسجل
وبعدين بعتنا التسجيل لمكتب كمبيوتر و كتب الفيلم بعله
قعدنا عليه 3 ايام في القاهرة في بيت محمد في المعادي
و كتبناه
وتوتة توتة فرغت الحدوتة
وآدي الحكاية يا عم خالد
صباح الفل

أبوفارس said...

صباح الورد أبا يحي..حدوته صنع السيناريو ومراحل خروجه للنور جميله وحميمه جدا..وبالذات السندوتشات الغريبه..!!بس بصراحه أنا عجبنى دفاعك عن الفنانين اليهود ودورهم فى الفن المصرى عموما -"داود حسنى" أحد تلك اﻷسماء والا أنا غلطان- وده مش غريب على أنسان مثقف ذو حس أنسانى مثلك...ﻷنى أعيش فى مجتمع متعدد الثقافات واﻷعراق ويحتفى بتلك التعدديه يزعجنى أيما أزعاج ضيق اﻷفق وأستبعاد اﻷخر والخوف المرضى-فوبيا- من الغريب والجديد وأراها علامه تدهور وأنحطاط..شوف سرحنا فى الكلام كالعاده..أنا فى أنتظار الباقى..قراءه سيناريو تجربه جديده عليا ربما تكون تلك هى المره التانيه فقط...ولاأدرى لماذا تذكرت روايه بيروت بيروت لصنع الله....تحياتى..وصباح الفراوله...خالد

Ossama said...

عزيزي الجميل ابو فارس
د.خالد الاقصاء وابعاد الآخر وخلق العدو من علامات الخطاب الانتحاري
مثلما فعل هتلر في اكبر عمليات الانتحار الجماعي في التاريخ
ليس داوود حسني فقط ولكن عندك كمان الشيخ العفريت في تونس يهودي
وزكي مراد يهودي وهو ملحن ومطرب كبير وقد غنى من الحان سيد درويش خد البزة واسكت خد البزة ونام
وهي تنويعة وطنية رائعة على اللحن الشعبي المجنون الذي تغنيه الامهات لاطفالهن
كي يناموا
و حفلت بداية القرن باسماء هامة في السياسة والفكر والفن و لعب اليهود والاروام والارمن دورا هاما سواء على المستوى الاقتصادي او الاجتماعي او الفني
و ادوا دور الجماعة الوظيفية صحيح ولكن للقدرة الاستيعابية العالية للمجتمع لم نحس باضطهاد او مظاهر تفرقة واضحة
بل يسعني القول ان مظاهر الاضطهاد او التفرقة اللونية ضد سمر البشرة كانت اكثر جلاءا من مظاهر التمييز ضد الاخر المختلف دينيا
المجتمع كان يعترف بالاختلاف ويقبله ويضع له درجاته ويستوعبه
و من ثم كانت مصر قادرة على التطور المجتمعي السريع
والذي تجلى كاجمل ما يمكن ودون انشاء في ثورة 1919
حين رفض الفلاح الامي الحديث تماما مع لجنة ملنر وكان الجواب الدائم هو اسأل سعد باشا
في هذه الفترة غنى الجميع اغاني وطنية
مصرنا وطنا سعدها املنا
يا بلح زغلول يا حليوة يا بلح
يا لابس السترة
يعني يا دكتور خالد الموضوع مش جهجهون
الخطاب الانتحاري السائد يدمر الذوق و يعصف بالذائقة و يجلب المرض
الله يخرب بيوتهم
مساء الجمال والعسل و الكانتالوب اللي مش بتاع يوسف والي الماسوف على شباب..ولا بلاش
انما ايه رأيك في شخصية مدير التاكسي؟؟؟


عارف يا ي ...لو عرفت ده مين تبقى جدع صحيح

Anonymous said...

أهلااا
أنا أول مرة أدخل هنا
من أول مشهد حسيت بالفعل ان الكاتب كأنه متواجد فى البلاتوهات والاستوديوهات منذ ان نشات فى مصر
تسلسل وتطور..أقصد تدهور طبيعى رصدته السينما ربما بدون قصد
لحاله المجتمع المصرى من قبل فاروق ولحد دلوقتى
منذ أن كان المجتمع يتسع للكل دون النظر للديانة أو العرق
وصولا لفترة الحكم على مواطنة الفرد بديانته أو عرقه

لكنه واضح جدا للمتمعن فى اختلاف اللغة واختلاف الفرضيات والأسلوب ولغة الحوار بين الشخوص
تطور للأسفل

تحياتى

aboyehia said...

شكرا يا استاذة على المرور والتعليق الجميل
واتمنى تبقى مش آخر زيارة
ولو حتى تكملي حضرتك السيناريو
وتقولي لنا رايك في الآخر
اسامة