Wednesday, April 18, 2007

نورا نورا9



المشهد العاشر

نورا1 تطلى اظافرها وهى جالسه على الصوفا وترشف من كوب الويسكى .. وهى تدخن سيجاره وتحرك السيجاره من فمها ليدها وبالعكس ومن يد لاخري وهكذا هلمر2 ممسكا بمسدس فى يده ويرتدى زى الفداتئيين ويروح ويجىء
هلمر2:
نار نام نار نام تم تم تم نار تم تم تم نام
يرن الموبايل ويرد- أيوه .. الست فيرونيكا عندها شغل تقدر تكلمنى ( ويجلس ويلتقط ورقه وقلم ويستعد للكتابه ) الموبايل بتاعها ؟ .. دا بتاعها
أنامين ؟ الاستاذ الدكتور تورفالد هلمر .. استاذ ورئيس اقسام وكبير الخبرا فى جامعات مقدونيا .. وسكسونيا .. وفسكونيا ..واخصائى القلب والاورام و العلاج الروحانى وغير الروحانى .. بهزر ؟ أنا ؟
على العكس تماماً يا سيدتى .. الحياه صراع مستمر ضد النهايه المحتومه وأنا كسبت ( يغلق الموبايل ويقف ويعاود المشى ) آينز .. تسفاى دراى فير .. يدن تفي تري تشتري ون تو ثري آن دو تروا كاتر واحد .. اثنين .. ثلاثنه .. اربعه .. اونو دوا .. ترى كواترو...... خير ..النهارده عندنا تغيير
(يجرى لطاوله الحاسب ويمسك بالموبايل ويضرب الرقم الاخير وينتظر فى قلق )
مره تانيه انا .. تورفالد هلمر .. المعلومات السابقه اللى اديتهالك عن مهنتى كانت غير صحيحه . إفتكرت دلوقتى .. أنا مترجم حر .. احسن واحد مفيش شك فى كده وبكره احنا على فين بالضبط .. احنا مين .. انا ترجمت الكتاب المقدس لـ 35 لغه ولخمسه وتلاتين لغه تانيه فى نفس الوقت .. فورى .. محدش يقدر يكسبنى فى سعه ودقه الترجمه الفوريه .. ألو .. الو .. ( يضع الموبايل .. يجلس على الفوتاى .. يحملق فى نورا التى تأتى م المطبخ حامله معها كوب من الشاب .. تضعه على الطاوله الكمبيوتر وتربت على كتف ورأس هلمر)
نورا2:
شاى علشان ارنوبى الحبوب
هلمر2:
ارنوبى الحبوبي .. ( يضع المسدس على جبهته ) حبوبى الأرنوبى بوم .. بوم
نورا2: ..
ارنوبى الحبوبى لازم يشرب شاى حبوبى الارنوبى .. حلو علشان الحلو والشاى فيه الدوا .. والدوا علشان حبوبى .. يروح ينام
هلمر2:
الاستاذ الدكتور تورفالد هلمر خبير فى ... ( بسرعه شديده ) المورفولوجيا .. والنرولوجيا والجيولوجيا والبورولوجيا .. واليونولوجيا .. والمكسولفيا .. والاستاتيكا والبولوتيكا والبرنطيقا .. والميكانيكا .. برافو الاستاذ الدكتور تورفالد هلمر .. حل اللغز .. مكافأه

( هلمر يمد يده .. نورا تبحث فى جيبها وتجد شكولاته تقطع منها جزء وتضعه فى يد هلمر 2 )
نورا2:
برافو ارنوبى الحبوبى .. ودلوقتى الشاى علشان ارنوبى ( يمد يده تقطع قطعه اخرى ويأكلها ) بالهنا يا صغنن .. ارنوبى الحبوبى يشرب الشاى ويروح ينام يا صغنونى (يمتد هلمر على الارض فى وضع الجنين)
هو الارنوب نسى ان عنده سرير
هلمر2:
يغمم لنفسه الاستاذ الدكتور تورفالد خبير .. الاستاذ الدكتور هلمر خبير علم الحساب .. علم الأنساب .. والكتاب والسباب .. والشباب والكباب و35 مرض خطير بتهدد البشريه ( يتثاءب) الاستاذ الدكتور هلمر .. هلمر استاذ دكتور ارنوبى الحبوبى .. لازم يروح ينام
( تنحنى نورا 2 عليه وتهززه من كتفه .. هلمر 2 نائم )
تقف- الحمد لله .. 10 ساعات على الاقل
؟ تتجاوزه وتلتقط الموبايل وتطلب رقماً .. يرن موبايل نورا 1 وترد - أهلا .. ممكن اجى دلوقت .. الوقت مناسب
تنظر فى ساعتها - اعتقد كده .. ح ابقى لوحدى 3 ساعات كمان
كويس اشوفك (تنحنى على هلمر وتلتقط المسدس وتضعه مع الموبايل فى حقيبتها وتخرج من الباب الرئيسى نورا2-
تنظر نورا1 لاظافرها المطليه - نا نا نا نا نا نا .... نا نا نانا نا
( يدخل هلمر1 من الباب الرئيسى ويتسلل خلفها ويقف خلف الصوفا بحيث لا تراه )
نا نا نا نا نا ... نانا نا نا نا

مرتعبه - يوه خضيتنى يا تورفالد .. جيت إمتى ؟ مش عادتك دا انت لسه قدامك 3 ساعات على الأقل
هلمر1:
اتضايقتى ؟

نورا1:
طبعاً لا .. بس خضتينى .. يا ربى .. فيه حاجه غلط ؟
هلمر1:
ابداً .. الوليف رجع يشوف لو الحمامه عايزه مراعيه
نورا1:
انامش فايقه لنكتك القديمه
هلمر1:
كان ممكن اتصل أأقول انا جاى زى فرافيروا .. بس أفتكرت صاحبنا القديم الاستاذ حظ
نورا1:
مش الأحسن تستنى وقت مناسب
هلمر1:
مش دا اللى انا بأعمله ؟ الجتت مستنيه المشرط بتاعى
أنا العبيط مستنى اخد حقى من مراتى
نورا1:
مش حرد عليك
هلمر1:
استعبطى زى العاده
نورا1:
تورفالد علاقتنا فى مرحله حرجه
هلمر1:
علاقتنا ؟ الكلمه دى منين .. من قاموس الكلمات الجديده
نورا1:
من قاموس الإكلاشيهات .. ماهى بقت كده وانت بتعمل كل اللى بتقدر عليه علشان تخلى الأمور اسواء
هلمر1:
قبلتى إنى ارجع .. كنت عاوزانى .. ودلوقتى مش قادره تقبلى رغباتى
نورا1:
يمكن مش قادره اأقبل انك هنا والمفروض تبقى هناك
هلمر1:
اللى مش قادره تقبليه .. ان أنا مش جته .. أنا عارف لعبتك إنك م تحبيش تخسري لما تخسري تفلسى .. حرقت لك الواد تقومى ترمى الكوتشيينه مش كده ؟
نورا1:
ارجع شغلك يا تورفالد ارجوك
هلمر1:
بتحنى ليه ؟
نورا1:
مين اللى باحنله ؟
هلمر1:
الاستاذ العيان .. الاستاذحديده .. م قلتليش ليه إنك زرتيه لما رجعت
نورا1:
كان لازم اخلص مسائل معاه .. كنت برعاه .. هو كان
هلمر1: ...
م كانش لازم .. كنت عايزه .. كام مره ..؟
نورا1:
كام مره إيه ؟
هلمر1:
كام مره ركبتى عليه ؟
نورا1:
كفايه ( تقوم ) إنت إيه مولود أمتى ؟ ده عيان بس إنت عيان اكتر منه بكتير
هلمر1:
ح أقتله وإنتى السبب
نورا1:
أنا السبب
هلمر1:
أنتي إديتنى المسدس وأنا حطيت رصاص حقيقى-يمشى نحو الباب يستدير ينظر لها ثم يخرج
نورا1:
يا إلهى .. ( تلتقط الموبايل .. تضرب رقماً .. يرن على طاوله الكمبيوتر لهلمر2 .. يتحرك هلمر ويصحوا ببطء
الموبايل ما زال يرن .. تيأس نورا وتضع الموبايل .. تصب كاس ويسيكى لنفسها
نورا تستكمل طلاء اظافرها ) نا نا نا نا نا ... نا نا نا نانا - تدخل نورا 2 من الباب الرئيسى تتوقف وتصغى لنورا 1 .. تتنحنح لنورا 1 . وبدهشه تستدير تنظران لبعضهما البعض لمده 30 ثانيه
نورا2:
إنت مش كده ؟؟ تبتسم 2وتدخل الغرفه
نورا1:
وإنت مش كده يرضوا ؟ ( تمشى لمكان على الصوفا وتدعوها للجلوس بجانبها تجلس نورا 2 ) إنت أحلى بكتير من اللى كنت خايفه منه
نورا2:
وإنت كمان
نورا1:
تضحك -أنا بقره مجنونه بتتمنكر ضوافرها عشان مش لقيه حاجه تانيه تعملها
دا انا جربت 20 نوع من الاكلادور ( تشير لصف من زجاجات الاكلادور على الترابيزه)
نورا2:
غربيه إننا ما تقبلناش قبل كده
نورا1:
ممكن إتقابلنا .. تورفالد بيقول
نورا2: ...
تورفالد مين ؟
نورا1:


تبتسم- تورفالد بتاعى
نورا2:
بتاعك مين ؟ينظران لبعضهما البعض لفتره وجيزه
نورا1:
جوزى .. رئيسك فى السابق فى المشرحه .. الدكتور الشرعى .. جوزى السابق واللى يمكن يرجع سابق بسرعه .. بيقول ان فيه عالمين على الاقل ..
كل اللي احنا محتاجينه نمد ايدينا( تمد ايديها وكذلك نورا 2 لكن فى اتجاه مضاد)
يمكن هناك قدام الكمبيوتر قاعد تورفالد تانى عايش حياه موازيه مع نورا 2 زيك ويمكن حياتك هناك معاه هى الحاجه اللى كلنا نفسنا فيها دايما أنا وتورفالد بتاعى

نورا2: ...
؟ تضحك ضحكه صغيره- مش معقول .. كان نفسك فى كده
كمان نورفالد بتاعى اللى كان بتاعك كمان .. بس زود شويتين م بيقعدش على الكمبيوتر وبينام على اللأرض قدام الفوتاى .. معدش مريض بالوهم بقى مجنون رسمى
نورا1:
يا حرام م كنتش عارفه
نورا2:
تلتقت حولها- مدهش .. نفس العفش تقريباً
نورا1:
أيوه .. نورفالد بتاعك القديم والجديد .. قال إنه تمام زى عفشكوا حتى لون الحيطان
نورا2:
ممكن جداً
نورا1:
يبقى انت صدقتينى ؟
نورا2:
لا انا ليا أفكاري بخصوص العالم الموازى .. أظن ان كلنا عايشين فى عالم واحد بس محبوسين فيه محكوم علينا بالحياه الشاقه المؤبدة
نورا1:
مش فاهمة بالظبط؟
نورا2:
عايشين فى عالم من أوهام الرجاله منقدرش نحوله حقيقه .. علشان كده لما بيحبونا قوى بيكرهونا .. عايشين فى عالم من رغباتنا اللى م يقدروش يحققوها .. وعلشان كده بيكرهونا برضوا
نورا1: ..
مقدرش أقول انى بكره حد فيهم
نورا2:
الستات متعرفش تكره
نورا1:
والصداقه؟
نورا2:
هى مرحله من مراحل الحكمه .. وهى من مراحل اليأس برضوا
نورا1:
أنا سعيده إنك جيتى
نورا2:
أنا سعيده إنك قبلتى إنى أعزم نفسى من غير اى تحفظات
نورا1:
كان فيه تحفظات وكان فيه أعتراضات بس مش الفضول اللى خلانى أأقبل
نورا2:
بجد ؟
نورا1:
بجد .. أنا فهمت إننا عيله واحده .. لو فيه عالم كان ممكن احنا الاربعه نعيش مع بعض
نورا2:
العالم ده موجود .. واحنا عايشين فيه مع بعض
نورا1:
( تبتسم- نفسى قوى أصدق الكلام ده ( يدخل هلمر من الباب الرئيسى يلاحظ هلمر 2على الارض ينحنى عليه ويهزه .. هلمر2 يفتح عينه
هلمر1:
إيه نظامك ؟
هلمر2:
نصف نائم - الاستاذ الدكتور تورفالد هلمر .. خبير فى الفولوجيا .. النولوجيا والاطفال والكبار والعصبيه ( يخرج هلمر1 زجاجه صغيره من جيبه .. يفتح فم هلمر 2 بالقوه ويرششيء ما في حلقه)
هلمر1:
حد خدرك بمخدر قوى ( يمسكه ويقيمه على قدميه ثم يجلسه على الفوتاتى ) طريقتها
نورا2:
الحقيقه أنا مش جايه اشوفك ... انا جايه لهدف
نورا1:
فعلاً
نورا2- آه. ا أسفه .. أنا قولت أنا اسفه .. بس أنا قاعده أحول نفسى من كائن بشرى لراجل .. ومن راجل لكائن بشرى ..
هلمر2:
المترجم خائن باللاتينى تراديتورى ترادتورى .. الرجاله كائنات ناقصه وكل كائن بشرى ناقص .. الرجاله مش بشر
هلمر1:
واضح انك اتبرمجت .. الستات مش بشر
هلمر2:
الستات ألهه وقعوا وهما نزلين من الهرم .. واتكعوروا
واتعوروا م بقوش قادرين يرجعوا تاتى .. الحق عليهم م قعدوش مطرحهم ليه ؟
نورا2:
أنا جاى أأقتلك
هلمر1:
أنا جاى أأقتلك
نورا1:
تضحك - بالبتاع الصغير ده ؟
هلمر2:
حقيقى .. الله يخليك ( يبحث فى جيوبه ) أنا معايا مسدس .. هو راح فين ؟
هلمر1:
دلوقتى لقيت حد تانى سبقنى ؟ أسف يا زميل الرجاله بتقتل بسرعه الستات بقى بتقتل ببطء علشان بيتمتعوا بالقتل
نورا2:
عرفتي ازاى إني مش حاطه رصاص حقيقى ؟ تخرج المسدس من حقيبتها وتصوب على نورا1
هلمر2:
أنا عارف إنت مين .. كانت دايما بتتكلم عنك بكل خير .. أظن إتها حبتك
هلمر1:
مين ؟
هلمر2:
نورا
هلمر1:
نورا مين فهيم .. بتاعتك ولا بتاعتى؟؟
هلمر2:
بتاعتنا كلنا .. تضايق لو قلت بتاعتنا
هلمر1:
قول وخلصنى بس هي مين ..؟ انا لسه مش عارف
هلمر2:
مش مهم .. قريب قوى الكلام هيخلص منى .. طز .. حاشرب شاى ارنوبى الحبوبى .. وأحلم .. عجزت السنه اللى فاتت شئ رهيب مش كده ؟ اكبر سنه كامله من السنه اللى قبلتها .. لو الموضوع استمر على كده .. هتخلص سنين عمرنا .. مرعب .. بس .. أنا كنت هعمل إيه بالسنين لو مخلصتش .. تقدر تقولى
هلمر1:
ممكن تحاول ترجع كرامتك زيي – يقوم
نورا2:
مش خايفه ؟
نورا1:
مرعوبه قبل م ادى المسدس لتورفالد بتاعك .. عشان يخوفك لما يموتك تورفالد بتاعي كان غير الرصاص وحط رصاص حقيقى

هلمر2:
إنت مين .. بجد أنت مين ؟
هلمر1:
مش هتحب تعرف
هلمر2:
لا .. نفسى أعرف .. كلامك نفخ قوى .. كرامه .. دى من قاموس الكلمات الجديده مش كده .. طالب طب بعهولى من سنين فاتت
هلمر1:
أنا
نورا2:
يعنى ؟ ( تنظر للمسدس في يديها
نورا1: -
وأنت عايزه تقتلينى ليه ؟
نورا2:
علشان م عدتش فاهمه حاجه خالص
نورا1:
ولا أنا .. لكن ادينى بحاول .. مش كده معقول ؟
هلمر2:
اللغه .. هى اللعنه اللى حلت علينا .. عايشين فى عالم اسمه بابل
هلمر1:
واضح انك مش مجنون قوى زى م عاوز الناس تفتكرك
هلمر2:
حتفضحنى لو قلتلك أنه صح ؟ مش ممكن مش كده ؟ الضحيه مش ممكن تسلم ضحيه زيها للجلاد .. لعشماوى .. وإلا ممكن والله ما انا عارف .. ماشى ح خاطر .. ايوه أنا مش مجنون زى م أنا عايز الناس تفتكر فى .. وده يخلينى اكسب شويه حاجات صغيره كده .. ماقدرش أعيش من غيرها
هلمر1: .
وعزه نفسك ؟
هلمر2:
كلمه من مضاف ومضاف اليه من قاموس الخرافات .. إحنا رجاله وبنفهم النسوان والنسوان تفهمنا .. إننا متحكمين .. بشم كويس .. طب باشم أيه ؟ ريحة الستات .. الورد الحلو.. السم اللى فى شوكهم .. الرجاله اللى خايفه .. تستخبى .. معندهاش عزه نفس .. اى سؤال تانى؟
هلمر1:
لا نكتفى بهذا القدر
هلمر2:
كلك ذوق .. شكرا ( يعود للنوم على الارض .. تضع نورا 2 المسدس فى الحقيبه وتتقدم وتركع امام نورا 1 وتضع راسها فى حجرها نورا 1 تنحنى عليها وتحضنها)
هلمر1:
أناحاسس ان فيه حد كسب فى اللعبه دى .. بس لو سالتنيى مين هقولك م عنديش اى فكره
هلمر2:
دور الكسبان كتير عليا .. خده إنت لسه شباب يمكن يفيدك بس أحب أأقولك .. إن عبارة إن الستات تحب الكسبان مش مظبوطه قوى .. الستات بتحب نفسها في أدوار مختلفه .. مره كده .. ومره كده وهلما جرا
هلمر1:
للاسف م كانش فيه فرصه نبقى صحاب
نورا2:
للأسف م كانش فى فرصه نبقى صحاب
هلمر2:
يا راجل .. دا قاموس الفرص الضائعه ولا وحتى نقطه فى بحر
هلمر1:
نروح ازاى هودا السؤال؟؟

هلمر2:
مش مهم .. المهم م تنساش تبقى تقفل الباب وإنت خارج
هلمر1:
فيه اى حاجه حصلت .. إحنا رحنا فى حته ؟
هلمر2:
ليه حكايه مين وإمتى دى بطل جغرافيا وتاريخ وتربيه وطنيه صدقنى .. اكبر مغامرة هى إنك تفضل زى ما أنت
هلمر1:
حقيقي انا مرة شفت فيلم تسجيلي عن زرافة بينقلوها من جنينة حيوانات لجنينة تانية.......
اظلام تدريجي ثم يسدل الستار .......

10 comments:

Malek said...

معلش يا جماعة كده تمت المسرحية بفضل الله
انا آسف على كل التأخير
بس النص عندي كان مليان اخطاء
النسخة دي اكثر نسخة مدققة ومصححة
يعني اي حد عايز يعملها ياريت بس يبعت لي ايميل
انا في انتظار التعليقات
اسامة
ولا تنسوا الاختيارات

Immature said...

دكتورنا العزيز
انتهيت من قراءة باقى المسرحية متأخرا كعادتى ولكن كان افضل برضه انى اقرأ "لكة" على بعضها بدلا من المشاهد المتباعدة
النص اصبح اكثر دسامة وتشابكا واعتقد ده الجزء اللى لازم يتشاف خصوصا بعد لقاء النورتان
ومش عارف ليه حاسس ان فيه مشهد اتحط قبل مشهد او يمكن ده ناتج عن القراءة المتقطعه

الترجمة طبعا لا يعلى عليها ولم اشعر بالغربة الا عند قراءة كلمة "تورفالد" اللى اصبحت "وحيد" ... ولكن عندى سؤال بعد ما انتهت المسرحية .. هل ياترى فليسار عمل مسرحية تانية اسمها تورفالد تورفالد علشان يوازن بيها الكفة شوية ؟ لانى بصراحة تعاطفت مع تورفالد وزرافته المسكينة بينما استفزتنى معظم تعليقات الست نورا

جون ترافولتا مرة تبنى وجهة نظرها فى وصفها لشعور الرجل تجاه المرأة عندما اقتبس احد المقولات فى احد افلامه وقال العبارة التالية

Women . . we spend the first 9 months of our life trying to get out of them .. then we spend the rest of our lives trying to get back in !!

وياريت كمان يا دكتور نعرف رأيك الشخصى فى نورا وهل ياترى رأيك كان له اى تأثير فى ترجمة النص بشكل او بآخر ؟

Malek said...

ياه يا ي ده انت شديد قوي
عارف المثل قطعت جهيزة قول كل خطيب اهه انت عملت كده وزيادة
جبت من الآخر
عن نفسي حبتدي من الآخر
لا رايي في كل النوراهات مأثرش في الترجمة بمعنى انا بحاول جدا وانا بترجم انقل النص كما وصلني بلغته الاصلية و يمكن في النص ده لاني اعتمدت اكتر على الانجليزي اللي هو برضه ترجمة فليسار لكن كنت برجع للنسخة السلوفيني دايما
مع اني بطبش في السلوفيني يعني هو شبه الكرواتي بس مش بالظبط
يظل ان اللي كان حاكمني دايما هو النص ومحاولة ايجاد المعادل المصري له على فكرة المسرحية حقيقي دمها خفيف ولما اتعملت كانت الناس ممسمرة في الكراسي ومبسوطة جدا وبتقهقه مش عشان النكت السكس لا عشان خفة الدم اللي فيها
لا فليسار معملش مسرحية اسمها تورفالد تورفالد
بس على فكرة نورا نورا بالسلوفيني تعني برضه مجنونة مجنونة يا حمرا يا قوطة لا تعني مجنونة بس
وممكن هنا تكون لعبة على الدنيا او العلاقة بين الراجل والمرأة الخ
نرجع بقى لايفالد في مسرحياته الاخرى
هو عمل شغل كتير على العلاقة بين الراجل والمرأة يعني مثلا عنده مسرحية اسمها تريستان وايزولدة وهي على اسطورة شهيرة جدا في المنطقة يعني وسط اوروبا وهي اسطورة تيوتونية يعني الماني
وعن عصر الفرسان وتعتبر من قصص الحب الخالدة
وبرضه على الجواز والعلاقة الزوجية
هو طبعا مع تورفالد يعني مع الرجالة وخصوصا وحيد 2 اللي انا حاسس انه شبهه قوي
بس مش حكدب واقول لك انا مع نورا يا ي
ما انا وحيد برضه
تحياتي القلبية والف شكر على التعليق الجميل ده
لكن مقولاتليش ايه اختياراتك للمرحلة القادمة
يعني تحب ايه زي ما سألت في البوست قبل اللي فات

Immature said...

تريستان وايزولده قصة مشهورة قريت منها اجزاء زمان من ييجى 457 سنة فى سلسلة روايات عالمية .. وبعدين شفتها فى فيلم من حوالى سنة

اما بخصوص الاستفتاء .. فأنا من مؤيدى القصص القصيرة علشان يبقى كل بوست عبارة عن قصة قصيرة ولا نضطر لانتظار البقية وناخد اجازة من المسرحيات شوية خصوصا انى النهاردة بالذات رايح مسرحية فى مكتبة اسكندرية للكاتب محمود ابودومة واسمها
مدينة النحاس

وعلشان كده بادى صوتى للقصة القصيرة ثم الرواية ثم مسرحية اخرى وكذلك الفقرة الرابعة مكرر فى الدستور المعدل وعاشت مصر حرة مستقلة

aboyehia said...

سؤال يا ي وصوتك يبقى بصوتين
وكمان حنقفل الصناديق النهاردة
وبكرة حنغير حسب الطلب
ازاي تحط رابط في التعليق؟؟

Immature said...

سهل يا دكتورنا العزيز
بس هو حضرتك مش هينفع اكتب الكود المطلوب وضعه هنا مكان التعليق . لانى لو كتبته البلوجر هيعتبره رابط آخر .. علشان كده انا حطيت الامثلة فى الصورة اللى موجودة
هنا

aboyehia said...

الف شكر يا ي
خلاص قصص قصيرة قفلنا الصناديق
بس قول لي مترجمة ولا عربي؟؟؟
بسرعة عشان حنبتدي بكرة

Immature said...

اذا كانت عربى فمين اللى كتبها ؟ واذا كانت مترجمة فمن تأليف مين ؟

ياسلام بأه لو كانت عربى ومغرقة فى المحلية كده زى كتابات احمد والى ومنير عتيبة علشان احنا بقالنا فترة بعيد عن المحليات
بس طبعا القرار الاخير لسيادتكم يا دكتور .. ماهو مش ابقى شحات وعاوز عيش فينو كمان !!

انا لسه راجع من مسرحية مدينة النحاس لمحمود ابو دومة ومن اخراج اديتا براون
المسرحية كانت رائعة بس قصيرة كعادة الحاجات الحلوة ..
طبعا الاداء الحركى للثلاث مؤديين النمساويين كان اكثر من رائع دول قرود مش بنى آدمين !!! والنص برضه كان كويس ولكن الاداء الحركى ظلمه كتير لاننا حسينا بمجهود الثلاث نمساويين اكتر ما حسينا بالقاء المصريين الثلاثة بالرغم من محاولتهم مجارة القرود الثلاثة الاجانب فى الاداء الحركى ..

أبوفارس said...

د.أسامه...تعليق متأخر جدا كنت أفضل يكون حوار ع الماسنجر عشان أستفيد أكتر...
أولا الترجمه هايله...
وبالمناسبه حضرت محاضره هنا ﻷتنين مترجمين واحد ترجم لهافيل من تشيكى ﻷنجليزى والتانيه بتترجم أدب كندا المكتوب بالفرنسى للأنجليزيه..
المهم علقت على صعوبات الترجمه اللى هم أقترحوها أنهم فى النهايه بيترجموا داخل نفس الثقافه ممكن لغات مختلفه لكن أساسا المرجعيه الثقافيه واحده ..أما محاوله الترجمه بين ثقافات مختلفه فهو ده التحدى الحقيقى..
المترجم بتاع هافيل ماوافقش قوى وكان بالنسبه له أن الثقافه التشيكيه مختلفه "تماما" عن ثقافه أمريكا الشماليه ..
الطريف أن أحد الحاضرين روسى أو أوكرانى -م اللهجه- وأحنا خارجين وقف يتكلم معايا وأهتم أنى أديه أمثله للفروق الثقافيه دى...فكان أسهل لى أنى أخد أمثله من ديستويفسكى مثلا....
أما موضوع المسرحيه فهو تلك العلاقه المركبه بين الرجل والمرأه..واللى حتى اﻷن ورغم الحل والترحال ومحاوله الفهم المستمره لسه ملخبطه بالنسبه لى...كنت أظن أن اللغه المشفره التى تستعملها نساءنا فى شرقنا السعيد هى نتاج لظروف الضغط اﻷجتماعى الطويل..لكن وجدت أن بنات ثقافات منفتحه أيضا يستعملن لغه مشفره عليك أن تفكها..حاجه كده "زى أوعى تكلمنى بابا جى ورايا" الله مش مفروض الحكايه تكون أوضح شويه...والا الترجمه هنا بين ثقافات مختلفه هى أيضا مستعصيه...أنا أتحدث عن تجارب شخصيه...وأخرى راقبتها ﻷصدقاء...
سؤال... لو المرأه عبرت عن مشاعرها بصراحه هل سيقلل هذا من جاذبيتها وهذا الغموض الجذاب ويقلل من حماس الرجل للمطارده..؟؟؟بعدت أنا قوى كده عن الموضوع اﻷصلى ...بس أحب أسمع رأيك...
تانى عمل واضح فيه الجهد المبذول وواضح الجديه وسط زمن سلق البيض والسبهلله.....تحياتى..وعميق تقديرى.....خالد

Ossama said...

Dr khaled
better late than never
طبعا انت مش متأخر ابدا يا باشا هي فسحة ولا حصة تدبير منزلي؟؟؟
ياريت تبص على نهاوند في حتة اغنية تخصك
ميا مسا بالشامي
حعمل لها تحليل نصي ومقارنة يا جميل
المهم نرجع مرجوعنا لجنس النسا
شوف يا باشا
في تقديري المتواضع شخصي وعام في آن واحد
طبعا فليسار لعبها هايلة هنا
وطرح حاجات كتير منها لعبة الشد والجذب و السيطرةو الجنس و ايه اللي نحبه وايه اللي بيحبوه
لكن يظل برضه شخصي
دي خبرة شخصية متواضعة
ويا ريت نبقى نتكلم فيها ع المسنجر
الحد الجاي 6مايو نفس الميعاد معلش المسنجر مكانش شغال لحد امبارح
سلام مؤقت على فكرة مقولتش ر؟أيك في شغل مكاوي ولا
في شغل محمد حسان