Monday, March 12, 2007

نورا نورا 2




تدخل نورا 2 عائده من العمل من اليمين وتلقى حقيبة يدها على الفوتاى .. يحاول هلمر 2 أن يغلق الإنترنت ويحول الكمبيوتر إلى وورد
نورا2:
حبيبى الشاطر بيشتغل ؟
هلمر2:
زى العاده
نورا2:
ترجمت كام كلمه ؟
هلمر2:
اكثر من الفين كلمه
نورا2:مش معقول ! اكثر من ألفين كلمه فى ترجمه مستحيله فى لغه مش موجوده انت عبقرى؟
هلمر2:
لا عبقريه ولا حاجه مجرد إصرار
(تلتقط سماعة التليفون وتستمع وتعيدها)نورا2 :
إصرار حقيقى على النت ؟
هلمر2:
بدور على حاجات
نورا2:
التليفون مشغول م الصبح أنا كنت بأحاول أتصل
هلمر2:
نسيت أقطع الإتصال
نورا2:
وعندك إيه إنهارده .. سرطان كبد ؟
فيبروبلاستوما ؟ ارتشاح رئوى ؟
هلمر2:
هدفع فاتوره التليفون
نورا2:
مش هيحصل لأن الدور عليا
هلمر2:
مش مهم
نورا2:
ما تيجى نروح البحر
هلمر2(مرتبكا): قصدك فى الصيف ؟
نورا2:
دلوقتى
هلمر2:
مش متأخر شويه ؟
نورا2:
بكره هاخد أجازه
هلمر2:
أنا تعبان
نورا2:
عمرك م كنت مش تعبان
تعالى زى ما أنت كده .. تعالى على إيديك ورجليك .. لو ما كنش فيه طريقه ثانيه بقالنا خمس سنين مرحناش أى حته
هلمر2:
ما تروحى لوحدك
نورا2:مش عايزه أروح لوحدى عايزه أروح معاك إحنا متجوزين مش ده العادى إن المتجوزين يروحوا سوا ؟
هلمر2:والعادى برضواإننا نقعدفى البيت
نورا2:
دايماً الحاجات اللى إنت عايزها
هلمر2:
كل واحد وطاقته
طاقتى نفذت وبصراحه وبكل أمانه قربت أبقى معوقه نورا2:

هلمر2: تهديد دا؟

نورا2:حاول تفهمنى يا تورفالد طول العشر سنين اللى فاتت معدتش عليك خمس ثوانى على بعض م فكرتش فيهم إنك حتموت بالمرض الخبيث
هلمر2:
ما تبالغيش
نورا2:عملت عشرين فحص كامل وكل مره كل اللى بيلاقوه شويه كولسترول مرتفع .. حتى الزكام ما جالكش غير مرتين فى العشر سنين .. يا راجل دا أنا بأنزكم فى الشهر مرتين
هلمر2:
لازم تخلى بالك من صحتك
إزاى أخد بالى من صحتى ومعايا جوز عنده عشرتاشر مرض جديد كل يوم نورا2:
هلمر2: متوسط محترم جداًعشرتاشر فى اليوم
نورا2:جالك عشر أنواع مختلفه من السرطان وخمس أمراض مستوطنه نادره م بتجيش إلا لبتوع غينيا بيساو فى خط الإستواء إنت اكتر مره قربت فيها من خط الاستواء كان يوم م حطيت صباعك على الكره الأرضيه ....جالك إلتهاب رئوى ، الزايمر ، باركنسون وضمور عضلات وتصلب شرايين وعن قريب الدكاتره هيخترعوا لك أمراض جديده مخصوص علشانك
هلمر2:
مش اتكلمنافى الموضوع دا قبل كده ؟
نورا2:
إتكلمنا فى إيه ؟
هلمر2:
كل واحد من حقه أو من حقها يستمتع أو تستمتع بالطريقه اللى تريحه
نورا2:
ودا يمتعك ؟
هلمر2:
واضح جداً
نورا2: بتتمتع بإنك تدور على أنك تثبت إنك عيان بتتمتع بإنك تقيس الضغط وتعد النبض كل نص ساعه تحلل بول وبراز ودم ولعاب ومخاط ومعرفش إيه ... وكل الأكل اللى بتتنيل وتحطه فى بقك عاوزه يتحلل علشان تعرف محتوى الدهون أد إيه
هلمر2:
أنا عمرى زعلت من هواياتك ؟
نورا2:
هوايات إيه ؟
هلمر2:
يعد على أصابعه: التأمل قرايه الكف الفنجان علم الفلك الطاقه العلاج بالروايح ، الكنيزيولوجى ، الكوتشينه ..... وبلاش أحسن نعد الكلام الفارغ اللى مش علمى وبيضحكوا بيه على الناس الهبل والسذج
نورا2:
أنا بأدور على الدليل إنى حية
هلمر2:
والنبى إيه ؟
نورا2:
إنت بتدور على دليل إنك بتموت أنا إيجابيه
هلمر2:
مش باين عليكى إيجابيه أبداً
نورا2:الفضل لحضرتك
إنت اللى جايه م الشغل تصرخى مش أنا هلمر2:
نورا 2(و هي تسقط على الفوتاى متعبه): إنت هتجننى
هلمر2:إنت اللى هتجننى نفسك دا إنتى تجننى بلد
نورا2:الغريب إنك لسه ما خدتش جايزه الترجمه
هلمر2:
بتتريقى عليا حضرتك ؟
نورا2:لا والله كل اللى بقوله بترجمه لغه خاصه بيك إنت الأبيض يبقى إسود والخير يبقى شر
إرحمينى الخير والشر مش كلام قديم شويه هلمر2:
نورا2:أه أسفه دايماً بأنسى إنك عبقرى ومثقف الخير والشر عندك مجرد كلمات فى فلسفة العامه الشر يعنى أى شئ على أد الحال واحد زميلى فى الشغل بيقول إنه كان فيه قاطع طريق زمان إسمه حسن شر الطريق
هلمر2
ينظر لها بتمعن :إنت فاضيه تدخلى فى مناقشات فلسفيه مع زمايلك فى الشغل
نورا2:
تبتسم :غيران ؟
يعود إلى الكتابه) :خالص ... مالص (هلمر2
نورا2:عمرك م بتغير .. لكن أنا عارفه إنى لو حاولت بالجامد قوى حخليك تغير
هلمر2:
الموضوع ده خلاص عدا أوانه
حاولى
نورا2: يمكن هى دى الطريقه الوحيده اللى ممكن أحييى بها الجثه اللى عايشه معايا فى البيت
هلمر2:
حتفضلى على كده كتير أنا عايزه أخلص الشغل اللى فى إيدى
إتفضل خلص (تسقط على الفوتاى) دانا ح دانا ح ..
هلمر2:حايه
حتعمليلى شاى مثلاً ؟
نورا2:أيوه ممكن أعمل شاى لكن مش حقدر ومش حعمل تقدر إنت ؟ حتعمل يا تورفالد؟
هلمر2:
ياربى هو كل حاجه عندك صريخ
ممكن تعملى كوباية شاى ياتورفالد ؟
هلمر2:
نورا ... أرجوكى ... أنا بأحاول اركز
نورا2:أنا تعبانه ولسه راجعه م الشغل وواقفه طول النهار على رجلى كتير أطلب منك كوباية شاى
عايزاه إيه نوعه .. فتله .. خرز .. إيرل جراى ... العروسه هلمر2:
نورا2:اللى تحبه (يدخل المطبخ .. تهرع نورا للكمبيوتر وتغلق ملف الكتابه وتفحص تاريخ ملفات الإنترنت المفتوحه .. تعيد فتح ملفات الكتابه ... تعود للفوتاى وتجلس متخشبه وهى تحملق فى الفراغ فيعود هلمر حاملاً كوباً من الشاى ويضعه على طاوله القهوه)
هلمر2:
عملتلك شيح أحسن ... الشيح مهدئ زى م بيقولوا ( يعود للكمبيوتر .. ثم ينظر إلى نورا) فيه حاجه ؟
نورا2:شكراً يا حبيبي .. (ترشف المشروب) يا سعدى يا هنايا .. أرجع من الشغل يقوم جوزى حبيبى عملى .. كوباية شيح .. كام واحده تقدر تقول جوزى عملى كوباية شيح
هلمر2:
يا فتاح يا عليم
نورا2(تمسك بالكتاب الموضوع على المنضده ):إيه ده قاموس الكلمات الجديده ودا جبته منين دا إنت م عمرك م بتخرج
هلمر2:من بياع م اللى بيخبطو ا على البيبان
نورا2:ومن إمتى بتفتح الباب لحد غريب ؟
هلمر2:
كان راجل لطيف جداً
نورا2
(ساخرة): سبب وجيه فعلاً
هلمر2:قالى إنه بيبيع القواميس علشان يخلص دراسته فى كليه الطب

نورا2:
وصعب عليك
هلمر2:
حاولت أساعده من غير ما أحرجه أى إعتراض ؟
وعرفت منين إنه مش بيضحك عليك ؟
م كانش لأنه.... هلمر2:
نورا2:
لأنه قعد يتكلم معاك عن أعراض الأمراض اللى عندك كان لازم أفهم طبعاً
هلمر2:
هو أنا لازم أعتذر عن إنى اشتريت قاموس محتاج ليه فى شغلى ؟
نورا2:
إنت بتدافع عن إيه ؟
هلمر2:
إسألى نفسك
نورا2:
يمكن أنا لازم أتعلم كلمات جديده (تفتح القاموس) م حدش عارف ... كلمات جديده .. أفكار جديده عصر جديد .. عمرك سمعت عن التطور المشترك
هلمر2:
فى إيه ؟
نورا2:
المستقبل .. الحاضر .. زى كتاب التغييرات الصينى بس الحدس هنا مختلف .. أنا أغمض عنيا (تغلق عينيها) وأفتح الكتاب (تفتح الكتاب) وأحط صباعى على كلمه ( تضع إصبعها - ثم تفتح عينيها ) ولقيت كلمه إيه ... كاروشى .. طبعاً إنت عارف معناها ما إنت تعرف كل حاجه
هلمر2:
لا .. ما أعرفش .. ارتاحتى
كاروشي .. الموت من الارهاق الناتج عن الإفراط فى العمل .. فى الجون .. الموضوع ده عام
هلمر2:
م كنتش فاكر إنك بتشتغلى جامد كده
نورا2:
دمك خفيف يا مضروب .. تورفالد .. أمتى آخر مره أخدنا أجازه ؟
هلمر2:
متبقيش ممله ومكرره
نورا2:
(تقوم)أنا مكرره وهفضل مكرره لغاية م تجاوب وتبطل قله.. أسفه يا تورفالد .... قاعد تبص على شاشه الكمبيوتر أربعتاشر ساعه فى اليوم وتقعد تترجم يجى ساعتين وتقعد تلعب فى دماغك وتدور على تشخيص لأمراض الوهم اللى عندك وباقى اليوم يا نايم يا مبحلق فى السماء .. قصدى السقف
هلمر2:
لا مش مضبوط
نورا2:
بجد ؟
هلمر2:
لا أنا بأعمل حاجات تانيه غير كده

نورا2:
قصدك بتعمل من ورايا ... لأنك عمرك م فاجأتنى من ييجى اكتر من 6 شهور
هلمر2:
أنا هفاجأك بسرعه مفاجأه جامده قوى
نورا2:لو كنت هعيش على وعودك كان زمانى مت (تتصفح القاموس .. يقترب منها من الخلف .. يخرج سكين صغير من جيب الروب .. يزيح شعرها ،يضع السكينه على رقبتها)
هلمر2:
ممكن تتفاجئ دلوقتى ؟
نورا2:
تورفالد
هلمر2:
إمتى حتبطلى تركبينى زى العفاريت ؟ هه ؟
نورا2:
تورفالد .. أرجوك
هلمر2:
ليه منبقاش زوجين طيبين ؟
هه ؟
قللى إنت نورا2:
هلمر2: نتفتى ريشى زى الفراخ وقطعت جدرى
أنا م عملتش حاجه يا تورفالد نورا2:
هلمر2: بصي لي هه شيفانى إيه راجل ولا دوده مهروسه
نورا2:
أنا عايزه أساعدك
هلمر2: مش عايز مساعده عايز أنساب فى حالى
نورا2:
دا أنا مراتك
ما هو عشان كده الست العاقله تسيب جوزها يتنفس هلمر2:
نورا2:ده أنا اللى هتخنق
يضغط بالسكين على رقبتها)وحاسه بإيه دلوقتى ؟ هلمر2:(
لذيذ ؟ أنا حاسس كده طول الوقت
نورا2:
تورفالد ... لا ... لا يا تورفالد
هلمر2:
وليه لأ
نورا2:
علشان بتحبنى .. حبك ليا .. وحبى ليك
هلمر2:
الحب ؟ جبتى الحفريه دى منين
نورا2:مش هعمل كده تانى .... وعد
هلمر2:
حتسبينى فى حالى ؟
نورا2:
أحلفلك
هلمر2:
(يبعدالسكين ويدفع رأسها بعيد) متفهمنيش غلط كل الناس من حقها تتنفس
نورا2: (تمسح رقبتها) إتنفس ياخويا براحتك يا تورفالد
يا كرم أخلاقك (يعود للكمبيوتر واضعاً السكين على الطاوله)
سؤال واحد
هلمر2:
حنبتدى تانى
نورا2:جاوبنى عن سؤال واحد .. دا كل اللى طلباه
اللهم طولك يا روح طيب سؤال واحد اتفضلى هلمر2:
نورا2:كنت بتدور فى النت على أعراض الإيدز ليه ؟
هلمر2:كنت عايز أعرفها عشان الترجمه
نورا2:أنت بترجم روايه من القرن ال 19
يقفز عليها ويبدأ فى ضربها .. تخفت الاضاءه حتى الإظلام, وفى الظلام نسمع نحيب نورا 2

6 comments:

Malek said...

بناءا على طلب الجماهير (ايماتيور هو الجماهير الهادرة من المحيط الى الخليج)الجزء الثاني من نورا نورا

ملحوظة
نورا كاسم له عدة مدلولات في هذه المسرحية
اولا طبعا الاشارة الى مسرحية بيت الدمية لابسن والتي يعتبرها النقاد نقطة تمفصل في تاريخ الدراما المعاصرة وايضا علامة على تغير النظرة الى المرأة و العلاقات الاجتماعية و الاسرية في الغرب
ثانيا نورا في السلوفينية وبالاخص في الللهجة الدارجة للعاصمة لو بليانا
تعني مجنون او مجنونة يعني اشارة لحالة الجنان في العلاقات الاسرية
ثالثا وهنا المفارقة
الفنانة الكبيرة ماجدة منير صديقتي العزيزة
اسم الدلع بتاعها نورا
والحقيقة انها ادت دورا رائعا
مع الفنانة نيفين والفنان المتألق حقا محمد علي شندي
و المرحوم الفنان الدكتور صالح عند العرض في الهناجر بالقاهرة
وكان المسرح كامل العدد
وايضا عند العرض في مسرح ماريبور القومي بسلوفينيا وكان ايضا كامل العدد

عندي العرض بتاع القاهرة على الكمبيوتر وربما ارفعه في يو تيوب لو حبيتم
و اعتقد ايضا ان عرض ماريبور مسجل وممكن الحصول على نسخة منه

Immature said...

شكرا جزيلا يا دكتور اسامة .. ربنا يكرمك يارب


هارجع اقرا الجزء الاول تانى علشان الضم ده فيه علطول

Immature said...

ياسلام يا دكتور لو تقدر ترفع العرض بتاع القاهرة على يوتوب .. تبقى فعلا حاجة ممتازة خالص
لانى ولعجبى الشديد لقيت نفسى وانا بافرأ الجزء التانى باتفاعل معه اكتر وباقلد هلمر2 ونورا2 اثناء القراءة !! بنقرأ بنفس طريقة الحوار محتفظا بالانفعالات التى تصاحب القاء الجمل وكأنى انا اللى بامثل .. مش بنقرأ برتابة وعلى تون واحد كما فى الجزء الاول
ياترى ايه السبب؟
سؤال تانى .. هل ياترى لو المسرحية اتعرضت دلوقتى فى ايام الدى اس ال هايعاد كتابة الجزء الخاص بالتليفون المشغول علطول فى اول الجزء التانى ؟؟

سؤال تالت .. مين كان حسن شر الطريق
السلوفانى ؟

سؤال رابع .. كنت هاعلق على تسمية نورا المألوفة فى لغات وبلاد كثيرة ..قبل ماتكتب تعقيبك عليها يا دكتور .. بس خلاص بأه ميجيش منه . بس ده يخلينى اسأل تانى مفيش تسمية غير هلمر دى اللى دايما انطقها هملر نسبة الى هملر الهتلرى؟

Ossama said...

ماهو انت يا سي ي لو بصيت في ام الرابط بتاع مسرحية نورا نورا الموجود في الجزء الاول حتعرف سمينا الراجل ايه في النص المصري

سميناه وحيد
عشان العادة في مصر هي الذهاب للسنيما
و وحيد اسم فريد والافلام الرومانسية
و نورا نورا يا نورا غنوة فريد
يعني لقينا حل
احاول ارفع العرض على يو تيوب يا ي
تحت امرك بس مش عارف ينفع ولا لأ
اعتقد السبب انك ابتديت تدخل قي النص اكتر وخصوصا
اعتقد انك حسيت بهلمر 2 اللي هو اسم بطل بيت الدمية تورفالد هلمر
طبعا مش قصدي انك غاوي غم
بالنسبة لحسن شر الطريق فدي معادلة هو كان بيقول لها ان فيه قصة شعبية بتقول حاجة مشابهةةللي اختارت ترجمته كده
لان لو تاخد بالك هو شخصية المفروض انها مثقفة قوي و كمان هيبوكوندرياك يعني مريض بالوهم و كمان قرفان م الوجود
يالا اتمنى اكون جاوبتك

أبوفارس said...

اﻷختيار ذوقه عالى قوى والترجمه جميله جدا يادكتور..فعلا لاتحس أنها مترجمه..
لاأستطيع تخيل صعوبه تأيف نص فيه كم اﻷيحاءات والتصريحات الجنسيه كهذا النص ليمكن عرضه أو حتى نشره فى مصر حاليا..
هل نطمع فى المزيد لنفس المؤلف ياأبويحي...ينوبك فينا ثواب...
تحياتى...خالد

Ossama said...

ابو خالد فيه مسرحيتين تانيين وانا رفعت قبل كده وحضرتك علقت على مجموعة قصصه القصيرة وقريبا جدا ان شاء الرحمن
مجموعة قصص سلوفينية قصيرة ومختارات من القصة القصيرة المصرية
والمسرحية عندي على الهارد
وححاول ارفعها على فيديو جوجل او يو تيوب
هي 310 ميجا
واجيب العرض المصري في سلوفينيا من فليسار يعني انت تؤمر ياباشا
احلام سعادتك اوامر واجبة التنفيذ
وطبعا عشان خاطر الجماهير الهادرة
ي